90 bat lagunek eman dute izena Ondarroako Jose Mari Naberan herri kroseko lasterketa nagusian
Handian 16 urtetik gorako neska-mutilek parte hartuko dute. Gehienak ondarrutarrak dira baina badago Lea-Artibai eta Mutrikuko parte hartzailerik ere. Lasterketa handiak 6 kilometro eta 800 metroko luzera edukiko du eta 17:00etan hasiko da ikastolan. Izen ematea bihar [azaroak 16] gauerdian amaituko da www.herrikrosa.eus webgunean, 10 euro ordainduta. Lasterketa egunean ezingo da izenik eman kros handian.
Beste bi lasterketak 380 metrokoa eta kilometro bat eta 340 metrokoa izango dira. Txikia 16:00etan hasiko da eta ertaina ordu erdi beranduago. Bi horien hasiera eta amaiera Itsasaurren izango dira. 15:15ean zabalduko dute izena emateko aukera Itsasaurren bertan.
Txikian Lehen Hezkuntzako 2.mailara arteko ikasleek parte hartu ahalko dute eta ertainean, berez, 16 urtetik beherako korrikalariek parte hartu behar badute ere handia egiteko gai ez direla ikusten dutenek edo handia egin nahi ez duten nagusiek ere parte hartu dezakete.
Inklusiboa. Lasterketak kutsu solidarioa edukiko du eta batzen den dirua Ondarroako Karenka elkarteari bideratuko zaio, urte osoan egiten dituen ekintzak burutzeko. Antolatzaileek azpimarratu dutenez kros txikia “inklusiboa” izango da. Horrela, aniztasun funtzionala daukaten neska-mutilei ere lasterketan arte hartzeko aukera eman nahi izan die antolakuntzak.
HONEKIN LOTUTA
Ikastolako urteurreneko batzordeko kideak, Karenkako ordezkaria eta Naberanen alaba, aurkezpenean.
