Mutrikuko EH Bilduk Kofradia Zaharraren inguruko erabakia parte hartze prozesu baten bidez hartzeko eskatu du
Mutrikun martxan jartzen diren proiektu garrantzitsuek “udaleko eragile guztien edo gehienen” onarpena eduki arren herritarrek euren iritzia emateko aukera edukitzea garrantzitsua dela dio Mutrikuko EH Bilduk.
Hori dela eta, uste dute “bide egokiena parte hartze prozesu erabakitzaileak martxan jartzea dela, bereziki proiektu horren aurrean ikuspuntu desberdinak daudenean”.
Kofradia Zaharraren proiektuarekin bide hori jarraitzea eskatu dute, eta bide batez EAJ eta B+I alderdiei bat egiteko deia egin diete, “herriari hitza eta erabakia emateko”. Kofradia Zaharrean gauzatu daitezkeen proiektuak ikusi eta beharrezkoak diren azterketak egin ondoren parte hartze prozesu erabakitzailea jarri nahi dute martxan.
Gaineratu dute askotan badakitela proiektu baten inguruko erabakia ez dela soilik udalaren eskumena, baina beste erakunde horien aurrean herriaren borondatea defendatzeko eskaria egin diote Mutrikuko Udalari.
EH Bilduk lau eskari dituen mozioa aurkeztu du Mutrikuko Udalean: parte hartze prozesua martxan jartzeko konpromisoa hartzea, udalak gaiaren inguruan hartutako erabakiak herriratzea, konpromiso ekonomikoa hartzea eta aurrekontuetan prozesu hau gauzatzeko diru partida gordetzea eta prozesuaren emaitza erakundeetan defendatzea.
Bestalde, aste honetan pankarta bat jarri dute Kofradia Zaharraren Lagunek, Noiz arte honela? Gure itsas ondarea hemen dioena.
Mutrikuko Kofradia Zaharra.
Kofradia Zaharraren Lagunek aste honetan ipinitako pankarta.
