Ondarroako musika kolektiboak Txilixoka Eguna antolatu du zapaturako
Txilixoka Musika Kolektibu izeneko elkarte berriaren aurkezpena egiteko zapaturako [abenduak 2] egun osoko egitaraua antolatu dute herriko musikariek. Alamedan ipiniko duten karpan egingo dira bazkaria eta kontzertuak.
Elkarteko kideek azpimarratu dutenez, egun horretan hainbat estilotako musika egiten duten musikariek parte hartuko dute jaian. Gainera, batzuentzat kontzertu bat ematen duten lehenengo aldia izango da. Beste batzuk, ostera, ibilbide luzeko musikariak izango dira.
Kontzertuak. Ondoko talde edo bakarlariek parte hartuko dute jaian: Biren, Keu, Piztiak, Beta, Markos Untzeta & Esku Hutsik, Gatz, Azalera, Itzalak, Hara!, Ardi Baltzak, ADR, Lau P4 eta Üther.
Alamedako ekintzak amaitu eta gero, Gaztetxean goizaldera arte jaiagaz gozatzen jarraitu ahalko dute herritarrek.
Herrian musika talde eta musikari asko egon arren, orain arte ez dute izan kolektiborik. Horren jakitun, Txilixoka Musika Kolektibu elkartea aurtengo udaberrian sortu zuten. Dena dela, zapatuko jaia kolektiboaren aurkezpen ofiziala izango dela aurreratu dute. “Gure lana herritarrei aurkezteko eguna izango da”.
Herrian entsegu lokalak erabiltzen zituzten pertsonak elkartu eta beharrizan berdinak asetzeko batzen hasi ziren; hilean bitan egiten dituzte batzarrak, Kofradia Zaharrean. Ondoko helburuak dituzte: lokalen erabilera erregulatu eta sortzaileen arteko harremanak sustatu, sormena bultzatu eta egiten duten lana kalera atera.
Azaldu dutenez, momentuz lokaletan entsegatzen duten taldeak batu dira, baina musika talde edo musikari hasiberrientzat “ateak zabalik” dituztela azpimarratu dute.
Elkartearen zein taldeen jarduna ezagutara eman asmoz, Txilixoka Musika Kolektibu Facebook orrialdea ere badaukate. Bertan jaso dute zapatuko jaiari buruzko informazioa. “Deialdiak zabaltzeko, herritarrek guri buruzko informazioa jasotzeko edota gurekin harremanetan jartzeko balio du”. Era berean txilixoka@gmail.com posta elektronikoaren bidez ere haiekin harremanetan jarri ahal da. Zehaztu dutenez, datorren urtetik aurrera urtean hainbat ekintza antolatzeko asmoa daukate.
ZAPATUKO EGITARAUA:
Gatz taldeko kideak oilotokian entsegatzen. Argazkia: Gatz
Azalera taldeko kideak. Ezkerretik eskumara: Beñat Bidegain, Jon Lasarte eta Lorea Zulaika.
- Bazkaldu aurretik. Trikipoteoa.
- 14:00etan. Marmitako jana (tiketak Anaitasuna tabernan daude salgai, 5 eurotan).
- 16:00etan. Bertso saioa.
- 17:30etan. Kontzertuak: Biren, Keu, Piztiak, Beta, Markos Untzeta & Esku Hutsik, Gatz, Azalera, Itzalak, Hara!, Ardi Baltzak, ADR, Lau P4 eta Üther.
