Primerako giroan ospatu dituzte sanandresak Etxebarrian

2017/12/05

Aurten ere, etxebarritarrek ez diete hutsik egin nahi izan San Andres jaiei. Askorentzat herriko jai kuttunenak izanik ez hotza ez eta elurra ere ez dira izan aitzakia jaiekin ez gozatzeko. Beste behin ere, adin guztietako herritarrak, ume, gazte eta nagusi, batu ditu ospakizunak, eta lagunarteko giro ona izan dute nagusi. Frontoia izan da, batez ere, jaietako topalekua; bertan hasi zituzten jaiak San Andres egunez [azaroak 30]. Ume eta gazteak buztinagaz jolasean jardun zuten goizean Rosa Etxabe herriko artistaren laguntzagaz, eta egurrezko jolasekin jostatu zuten arratsaldean. Ilusio handia eragin zuen gaztetxoen artean bai eta ere, San Andres Kartelen Lehiaketako sari banaketak. Olatz Gomez (0-5 urte), Nora Gomez (6-9 urte), Uxue Markiegi (10-16 urte) eta Semiramis Zangitu izan ziren garaileak, hala ere, parte hartzaile guztientzat egon zen oparia eta irribarrez hartu zuten ume zein nagusiek.

San Andres kartel lehiaketako parte hartzaileak eta Idoia Odriozola Arruti zinegotzia.

Jaietako kartel lehiaketako sari banaketaren ostean banatu zituzten baita herritarren briska txapelketako garaikurrak ere. Gazte mailako bost bikotek eta nagusien mailako 11k parte hartu zuten txapelketan. Gazte mailako irabazleak Jokin eta Sarai izan ziren eta nagusien mailakoak Rubio eta Alex. Afaria. Azaroaren azken eguna txerri-jana egiteko garai aproposa dela ondo dakite Etxebarrian, eta urte askotako ohitura horrek onespen handia dauka txiki zein nagusi. Mahai luzeak prestatzen dituzte frontoian eta jaki goxoez betetzen dituzte afaltzeko. Oraingoan 50 kilo odoloste, 40 kilo txorizo, 45 kilo hirugihar, 30 kilo gaztaina eta 12 kilo gazta egosi, frijitu, txikitu eta banatu dituzte herritarren sabelak ase nahian.

[Zuzenean ARGAZKI GALERIA ikusi]

Gutizia horiek guztiak laguntzeko, gainera, taloa izaten dute. Iaz 500 talo prestatu zituztela gogoan zeukaten talo eginean zenbilen herriko emakume taldeak, aurten, berriz, ez dituzte zenbatu, baina egin eta egin ibili ziren 16:30ean hasita. Denek ondo pasatzeko lanean jardun zuten arratsalde osoan. Kontatu zutenez batzuk hasiberriak ziren zeregin horretan, beste batzuk ordea, urte asko daramatzatenak.

Talo egile eta laguntzaileak janari prestaketaren atsedenaldian.

Txerrikiak frijitu eta banaketagaz berriz, herriko guraso elkartekoak arduratu ziren, eta ume eta gazteei banatu zieten lehenbizi jana. 20:00etatik aurrera, hasi ziren hurreratzen apurka-apurka nagusiagoak, herriko afarian parte hartzera. Bapo jan eta edan zuten zutik edo jarrita.

[Zuzenean ARGAZKI GALERIA ikusi]

Pilota partidak. Egueneko mahai luzeek pilotariei utzi zieten lekua barikuan. Esku pilota partidak lehenengo eta zesta-puntakoak jokatu ziren ondoren. Hiru partida egon ziren bakoitzeko. Esku pilotako lehen partiduan Mikel Egurrola eta Txomin Landaluze izan ziren nagusi, Ekain Idigoras eta Eritz Arrillagari 18 eta 17 estu bategaz irabazita. Bigarren norgehiagoka berriz, Aratz Martinezek eta Txomin Landaluzek irabazi zuten. 18 eta 15 menderatu zituzten Amets Alvarez eta Peio Arrizabalaga. Azken partidan Erlantz Azpiazu eta Dani Ormaetxea izan ziren garaileak Markel Egurrolari eta Ibon Etxaberi 18 eta 10 irabazi zieten.

Esku pilotako jokalariak txapelketa hasi aurretik.

Zesta-puntari dagokionez, Adrian-Kepa eta Goitia-Atain bikoteak izan ziren kantxara ateratzen lehenengoak. Retolaza eta Txomin Urri eta Mandiolaren kontra neurtu ziren ondoren eta Meabek eta Ibarluzeak osatutako bikoteak Antxon eta Etxeba izan zituzten aurkari azkenengo lehian.

[Zuzenean ARGAZKI GALERIA ikusi]

Mendi bizikleta. Jaietako azken egunean ere kirola izan zen protagonista. Amets Txurruka Lagunartiek antolatuta ume eta gazteentzako mendi bizikleta zirkuitua egon zen Errekarte etxe taldearen inguruan zehar. Lehenengo 4 eta 6 urte arteko bederatzi txirrindulari ibili ziren zirkuituan bueltaka eta 7 eta 8 urteetako beste zortzi, eta azkenik, 10 eta 13 urte arteko zortzi txirrindulari. Gora eta behera basaz betetako landan zehar gogor ibili ziren txirrindulariak. Bi, lau eta sei buelta eman zituzten. Horrez gain, DH ikuskizuna ere eskaini zuten adituek mendi bizikletekin. Mendian behera eta eskaileratan behera jauziak eginez harrituta utzi zituzten ikusleak.