Asteburua ez da ona izan nagusien mailako futbol taldeentzat
Mutriku Futbol Taldeko neskak izan dira bakarrik garaipena eskuratu dutenak; Artibai Futbol Taldeak berdindu egin zuen eta gainontzekoak, berriz, galdu.
Aurrera Kirol Elkarteak 1-2 galdu zuen sailkapeneko azkena zen Zallaren aurka. Ibon Lopezen mutilek markagailuan aurrea hartzea lortu bazuten ere Mikel Landaribarrek zazpigarren minutuan sartutako gol bati esker, ez ziren gai izan garaipena etxean uzteko, bigarren partiduz jarraian. Atsedenaldiaren aurretik eta 1-0eko emaitzagaz penalti bat huts egin zuten Aurrerakoek. Zallak, partiduaren azken 10 minutuetan lortu zuen markagailuari buelta eman eta puntuak Zaldupetik eramatea. Igoera postuak 6 puntutara dituzte orain ondarrutarrek.
Artibai Futbol Taldeak 0-0 berdindu zuen Barroetan zapatu arratsaldean. Aukera garbirik gabeko neurketa izan zen, nahiz eta etxekoak gehiago izan bigarren zatian. Partiduko albiste pozgarriena Aitor de Paz jokalari markina-xemeindarraren itzulera izan zen, itzuli oso bat min hartuta egon ostean jokatzeko aukera eduki baitzuen berriro ere.
Lekeitio Futbol Taldeak ere ezin izan zuen goiko postuetan sartzeko aukera baliatu Dinamo San Juanen aurka. Bi taldeak puntu bakarreko aldeagaz zeuden sailkapenean, beraz, partidu garrantzitsutzat hartuta zeukaten lekeitiarrek atzokoa. 2-1 galdu zuten eta Antxon Seijo izan zen lekeitiarren golegilea. Igoera postuak bi puntutara egoten jarraitzen dute, beraz, lekeitiarren aukerek bere horretan jarraitzen dute oraindik.
Bururik ezin jasota jarraitzen duena Berriatuko Futbol Taldea da, emaitzei dagokienean behintzat. Zapatu arratsaldean 3-2 galdu zuten Gernika Sporting taldearen aurka Urbietan; Unai Etxebarria eta Iban Graña sartu zituzten berdeen golak. Sailkapenaren azken postuan daude eta maila mantentzeko aukera emango liekeen postua sei puntura daukate.
Mutriku Futbol Taldeko nagusien mailako bi taldeek oso emaitza desberdinak eduki dituzte asteburuan. Neskek nagusitasun osoz irabazi zioten San Migel futbol zelaian Intxurreri. 7-2 amaitu zen kopako hirugarren jardunaldiari zegokion neurketa eta gol zaparrada horri esker sailkapenaren lehen postura igo dira mutrikuarrak; zazpi puntutara berdinduta daude Urola eta Aloña-Mendi taldeekin. Jone Antsotegi eta Argiñe Ansorregi hiruna aldiz eta Ane Alberdi izanziren zazpi golen egileak. Mutrikuko mutilak, aldiz, porrotarekin itzuli ziren urteko partidu berezienetako batetik, Debatik. Etxekoak nagusi izan ziren eta atsedenaldira 1-0 galtzen joan ziren Igor Elezgarai Txaparroren mutilak. Aldageletatik bueltan suspertu egin nahi izan zuten mutrikuarrek baina penaltiz jasotako bigarren golak partidua hautsi egin zuen. 92. minutuan jaso zuten mutrikuarrek debarren hirugarren eta azken gola.
Ibon Lopezen taldeak baja askorekin ekin zion zapatuko partiduari. Argazkia: Erik Osa/Leartigol
Lekeitio Futbol Taldearen hamaikakoa. Argazkia: Erik Osa/Leartigol
