Hiri Antolamenduko Plan Orokorra herritarrekin diseinatzeko bilera deitu du Ondarroako Udalak
HAPO herritar guztiekin erabaki nahi du Ondarroako Udalak, hurrengo 20 urteetan herrian egin beharreko azpiegitura garrantzitsuenak plan horretan erabakiko baitira. Horretarako, herritarrei eguenean [otsailak 1] 19:00etan Kofradia Zaharrean egingo den batzarrera joateko deia luzatu die. Ondarroa imajinatu izena jarri diote prozesuari.
Hiri Antolamenduko Plan Orokor horretan zehaztuko dira, besteak beste, Ondarroako lurzoruaren erabilerak eta hori erregulatzeko araudia, herriaren hazkunde eredua nolakoa izan behar den erabakitzeko. Esaterako, eztabaidara atera nahi diren gaien artean daude etxebizitzak non eraiki, ekipamenduak non egin edota Alde Zaharra nolakoa izan behar den. Bestalde, etxebizitzen egoera ikusita, Ondarroako Udalak esan du ” babes ofizialeko etxebizitzen eskaintza arautu” egingo dutela. Horiez gain, hezkuntza, kultura, kirola eta beste hainbat arlotarako ekipamendu publiko zien pribatuak aurreikusiko dira.
Prozesua otsailaren lehenean hasiko da, eta batzarrean zehaztuko dira eman beharreko urratsak eta epeak. Udalak argitu du teknikariak ere egongo direla batzar horretan, beraz, beraiekin hitz egiteko eta lehen iritziak jasotzeko leku egokia dela. “Alternatiba ezberdinak jasoko dituen aurrerapen dokumentua azalduko dute teknikariek, eta bertan, herritarrek zein den gehien atsegin dutena hautatzeko aukera izango dute”. Gaineratu dute herritarren iritziak kontuan hartuta erabakiko duela Ondarroako Udalak zein alternatibagaz jarraitu.
Ondarroako Udalak garrantzi handia eman nahi dio herritarren parte hartzeari HAPO berria diseinatzeko prozesuan, eta, beraz, ondarrutarrei egueneko batzarrera joateko deia egin die.
Alde Zaharrean zer eta nola egin erabakitzea izango da ardatzetako bat.
Kirol portua, Kantoipe eta eliza.
