Iñigo Martinez ondarrutarrak Athletic Clubegaz fitxatu du
San Mamesen iluntzean eskaini duen prentsaurrekoan eskerrak eman nahi izan dizkio Athletic Cluberi, bere alde egindako apustuarengatik. Josu Urrutia presidenteak ere eskerrak itzuli dizkio “urratsa ematen ausartzearren”. Gaineratu du ez dela erabaki erraza izan, baina denboran hartu duen erabaki onena izan dela: «alde batetik gogorra izan da, baina bestetik pozik. Nire kirol ibilbidean aurrerapausua dela uste dut». Gehitu du bere erabakia izan dela Bilbora joatea, eta uste duela onena dela berarentzat. «Erabakia hain egun gutxitakoa izateak argi uzten du interes handia zeukala klubak». Aitortu du Villarrealen aurka jokatutako ligako azken partiduaren ostean jaso zuela Athleticek zeukan interesari buruzko informazioa, eta egun gutxian hartu beharreko erabakia izan den arren oso pozik eta ilusio handiagaz dagoela.
Klausulei buruz galdetuta aipatu du berak ez zuela onartu Athleticen aurkako klausula sinatzea Realarekin: “ez naiz horren aldekoa”. Realarekin kontratua luzatu zuen aldian ere klausula ez handitzea “etorkizunean inori ateak ez ixteko” egin zuela esan du.
Iñigo Martinezek ez ditu aipatu gabe utzi nahi izan Realean lagatako oroitzapenak. Eskerrak eman dizkie sare sozialen bidez zabaldutako mezu batean Realean edukitako entrenatzaile, lagun eta lankideei, eta baita zaletuei ere, bereziki bere peñako kideei, “momentu on eta txarretan alboan egotearren”. Zaleei esan die beraiek direla Reala, eta “lasai” doala erronka berrira, “Realeko kamiseta jantzi dudan bakoitzean dena eman dudalako, beti nire onena atera nahian”. Agur bat egitea nahi izan duela ere esan du, “baina ez da posible izan”. “Eskerrik asko bihotzez.”
Atzelari ondarrutarrak Realagaz zeukan 32 milioi euroko etete klausula ordaindu du gaur [urtarrilak 30] eguerdian Athletic Clubek Futbol Liga Profesionalean, eta jokalaria zuri-gorria izango da hemendik aurrera. Kontratua 2023 urtera arte sinatu du Athleticekin eta klubak esan duenez bere etete klausula 80 milioi eurokoa izango da. Athleticek bere historian egin duen fitxaketarik garestiena da. Martinezek 2016ko apirilean berritu zuen bere azken kontratua Donostiako taldeagaz, eta berritze horretan bere etete klausula ez igotzea adostu zuen. Aurtengo denboraldian ezin izango du Athleticekin UEFA Europa League txapelketan parte hartu, aurretik multzoen fasean parte hartu duelako Realagaz.
Aurrerantzean lau izango dira Atheticeko lehen taldeko ondarrutarrak: Martinez bera, Kepa Arrizabalaga atezaina, Iban Urkiza prestatzaile fisikoa eta Beñat Azula fisioterapeuta.
Martinezek 26 urte ditu, eta kadete mailan joan zen Realera. Ordura arte herriko taldean aritu zen, Ondarroako Aurrera Kirol Elkartean. 2011ko abuztuaren 27an egin zuen debuta BBVA ligan Gijongo (Espainia) El Molinon futbol zelaian, Sporting taldearen aurka. Lehen Mailan sartu zuen lehen gola Athletic Clubi egin zion, hain zuen, Anoetan jokatutako euskal derbi batean, zelai erditik jaurtitako ezkerkada bategaz. 2012an Londresko Joku Olinpikoetan parte hartu zuen eta 2013ko abuztuaren 20an Txapeldunen Ligan egin zuen debuta Realarekin, Lyongo Olimpique taldearen aurka.
Espainiako selekzioagaz debut ofiziala 2016ko urriaren 9an egin zuen, Albaniaren aurkako partiduan; 0-2 irabazi zuten Errusiako Munduko Koparako sailkapen partiduan. Euskal Selekzioagaz ere debutatu zuen 2011ko abenduaren 28an, San Mamesen, Tunisiaren aurkako partiduan.
HONEKIN LOTUTA:
Inigo Martinez. Argazkia: Athletic Club
Iñigo Martinez eta Josu Urrutia. Argazkia: Athletic Club
