'Bizkaia Goazen' autobusa martxoan ailegatuko da Lea-Artibaira
Bizkaiko Foru Aldundiak Bizkaia Goazen autobusa eramango du lurraldeko ia 70 udalerritara, herritarrei informazioa emateko eta horien ekarpenak jasotzeko. Bilbon jarri zuten ikusgai lehenengoz martitzenean, eta bihar Sondikara lekualdatuko dute. Lea-Artibaira, berriz, martxoan ailegatuko da.
Pertsonengandik «oso hurbil» egotea bilatzen du aldundiak, eta, horregatik, herrietako plazetara eramango dute, aurrez aurre azaltzeko foru erakundeak eskaintzen dituen zerbitzuak zeintzuk diren eta egiten duten lana zein den. Era berean, herritarren iradokizunak jasotzea ere izango dute helburu. Espazio elkarreragilea, ikus-entzunezkoa eta multimedia eskainiko du.
Produktuen dastaketa. Aipatu autobusak elementu bi izango ditu: batetik, Bilboko Arte Ederren Museoko 40 artelanen kopien erakusketa jasoko du, eta, bestetik, foodtruck-a izango du aldamenean, Bizkaiko produktuak dastatzera emanez.
Martxoaren 14an eta 15ean Ondarroan egongo da autobusa, 16an Markina-Xemeinen eta 19an Lekeition.
‘Bizkaia Goazen’ autobusaren aurkezpena. Argazkia: Bizkaiko Foru Aldundia.
