Txapelketa ezberdinetan ariko dira asteburuan Markina-Xemeingo eta Mutrikuko puntistak
Gaur [otsailak 1] hasiko dira zesta-punta partiduak Mutrikuko Miruaitz frontoian. Udaberri Txapelketari dagozkion bi partidu jokatuko dira 18:30etik aurrera. Lehenengo, Markel eta Erlantz arituko dira Manex eta Unaxen aurka eta bigarren partidua Alain eta Markelek jokatuko dute Unai eta Oierren aurka. Bihar [otsailak 2] beste bi neurketa jokatuko dira Miruaitzen. Lehenengoa, Gipuzkoako Txapelketari dagokiona, Unai eta Oinatzen eta Hondarribiko bikotearen artekoa izango da, 18:00etan, eta 19:00etan berriz, Euskal Ligakoak jokatuko dira: Zuhaitz eta Aratz Biarritzen aurka eta Zumaia Markina-Xemeinen aurka.
Zapatuan, berriz ere, Udaberri Txapelketa itzuliko da Miruaitzera. 12:30ean Alex eta Xabierrek Zumaiako bikotearen aurka jokatuko dute. Egun berean, baina 16:00etan, Markina-Xemeingo Unin Ekaitz eta Mikelek Gasteizko bikotearen aurka jokatuko dute; Euskal Ligako partida izango da. Ordu bete beranduago hasiko dira Mutrikun Gipuzkoako Txapelketari dagozkion partidak. Hiru neurketa jokatuko dira: Ekhi eta Aimarrek Beotibarren aurka jokatuko dute, Ametsek eta Manexek Hondarribiaren aurka eta Unax eta Haritzek Eñaut eta Eneritzen aurka.
Puntista mutrikuar eta markina-xemeindarrak, Euskal Ligako partiduan. Argazkia: Danok Bat
