Gasolioa zeraman kamioi bat irauli da Aulestin
BI-3447 errepidetik zihoan kamioi batek istripua eduki du gaur goizean [otsailak 8] Aulestin; kamioia errepide ondoko zelai batean iraulita geratu da. Istripua 12:30ean gertatu da, eta kamioia Oletarantz zihoan. Ertzaintzak jakitera eman duenez, gidaria onik atera da. “Gidariak ez zeukan zauririk”.
Kamioiak gasolioa zeraman, eta irauli bada ere, ez da isurketarik gertatu. Kamioiak zeraman karga dela eta, Bizkaiko Foru Aldundiko langileak eta suhiltzaileak ere bertaratu dira. “Kamioia errepidetik kanpo geratu denez, garabia heltzeko zain daude oraindik”. Garabia ailegatu bitartean gasolioa eraman ahal duen beste kamioi bat ere bertaratu da. “Irauli den kamioiak zeraman karga beste kamioi horretara pasatuko dute”.
Irauli den kamioia. Argazkia: Bizkaiko Suhiltzaileak
