Herriko jolaslekuak hobetuko ditu Lekeitioko Udalak
Herriko hiru eremutan dauden jolaslekuak berrizteko lanak martxan jarri ditu Lekeitioko Udalak. Zehazki hobekuntzak izango dituzten eremuak Kasimiro Etxebarriako jolaslekua, eskolako patiokoa eta haurreskolakoak direla jakitera eman dute.
Alde batetik, Kasimiro Etxebarria auzoan dagoen parkeko jolaslekuan behegaina berria jarriko duela aurreratu dute. Bestalde, eskolako patioko jolastokia osorik aldatuko dute, eta zoru eta jolas elementu berriak jartzen hasi da udala aste honetan. Azkenik, haurreskolako patioan dagoen jolas-eremu bat egokituko dute. Behegaina berria ipinia dauka jadanik guneak, eta bertan txirrista eta zabu berriak jarriko dituzte.
“Horrekin, haur eta nerabeentzako jolaslekuen egoera hobetuko da, segurtasun handiagoa bermatuz”, adierazi dute. Lan horiek guztiek 48.561,75 euroko kostua izango dute.
Kasimiro Etxebarria parkea. Argazkia: Lekeitioko Udala
