Eskola kirolagaz lotutako mahai ingurua egingo dute Lekeition
Zapran gagoz Euskal Eskola Publikoaren 27. Jaiaren baitan, barikuan [otsailak 16] Baloreak kirolean tailerra (Koikili Lertxundigaz) eta Zer da eskola kirola? Helburuak eta ohitura osasuntsuak mahai ingurua egingo dituzte Lekeition. Tailerra 14:30ean egingo da, Lekeitioko Eskola Publikoan. Mahai ingurua, ostera, 18:00etan egingo da, kultur etxeko Azkue aretoan.
Koikili Lertxundik Lehen Hezkuntzako 6. mailako ikasleekin egingo du tailerra. Athleticen mailari gorenean bost urtez jokatzen aritu eta gero (2007-2012), Lertxundik Mirandes taldean bukatu zuen futbolari ibilbide profesionala. Birritan izan zen Espainiako txapeldun borroka greko erromatarrean (kadete mailan). “Gaur egun Eusport giza baliabideetako aholkularitza enpresa zuzentzen du, eta euskara eta kirola uztartzea da bere jardueraren ardatz nagusietako bat”.
Mahai inguruari dagokionez, parte hartzaileak ondokoak izango dira: Eli Ibarra eta Koikili Lertxundi Athleticeko jokalari ohiak, Maitane Toledo Oarsoaldeko Kirolaisi taldeko kidea, Luis Mari Zulaika EHUko irakaslea eta Carlos Sergio Magisteritzan diplomaduna, Gorputz Hezkuntzan lizentziaduna eta Bizkaiko Foru Aldundiko euskara eta kultura aholkularia. Moderatzaile lanak Asier Txakartegi Bizkaia Irratiko esatari lekeitiarrak egingo ditu.
