Manifestazioak egingo dituzte erretiratuek pentsio duinen alde
Pentsiodunen elkarteek eguenerako [otsailak 22] hiriburuetan deitu dituzten manifestazioekin bat egingo dute Lea-Artibai eta Mutrikuko erretiratuek. Pentsiodunen egoera salatu eta pentsio sistema “duin baten alde” manifestazioak egingo dituzte Bilbon, Donostian, Gasteizen eta Iruñean, eta euretan parte hartzeko dei egin diete Hego Euskal Herriko erretiratu guztiei.
Deialdiagaz bat eginez, Bilbora joan barik herrian bertan elkarretaratzea egitea erabaki dute Markina-Xemeingo Beti Jai jubilatuen elkartekoek. Horrela, 12:00etan jarri dute hitzordua Goiko Portalean. “Herrian egitea erabaki genuen jende gehiagok parte hartzeko aukera izateko eta guk ere protesta horregaz bat egiten dugula ikustarazteko”, azaldu du Jose Alberdi Beti Jai elkarteko lehendakariak.
Zehaztu duenez, Nagusiak Bizkaiko Jubilatuen Elkarteak mobilizazioagaz bat eginez banatu dituen kartelak hartu dituzte eta eurekin azalduko dira egueneko ekitaldira.
Eguenekoa ez da egingo duten lehen agerraldia. Lea-Artibaiko herri askotan pentsio duinen aldarrikapena kaleratu zuten orain dela aste batzuk ere.
Espainiako Gobernuak iragarritako %0,25eko igoeraren aurka daude erretiratuak. Erreformen ondorioz, bestak beste, erretiroa lortzeko lan urteak luzatu direla, alarguntza pentsioak jaitsi direla eta medikamentuen berrordainketa ezarri dietela salatzen dute. Bizkaia, Gipuzkoa, Araba eta Nafarroako plataformetako ordezkariek pentsioak KPIaren maila berean igotzea eta Europako Karta Sozialak aholkatutako 1080 euroko gutxieneko pentsioa ezartzea eskatzen dute.
Deialdiak. Bilboko manifestazioa 12:00etan hasiko da eta udaletxetik abiatuta Gobernu espainiarrak Bizkaiko hiriburuan duen Ordezkaritzaordetzaren parean amaituko da.
Donostian biltzeko hitzordua 11:15etan izango da Donostiako Amara plaza hotelaren parean. Ordu laurden beranduago abiatzekoa da hiriburuko kaleak zeharkatuko dituen manifestazioa.
Amorotoko elkarretaratzea. Argazkia: Amorotoko Udala
