Segurtasun Sailak alerta laranja ezarri du, elurragatik
Bai, beste behin ere elurra ate joka daukagu. Eusko Jaurlaritzako Segurtasun Sailak alerta laranja ezarri du biharko [otsailak 28]. Hain justu, aipatutako alerta gauerdian hasi eta 15:00etara arte egongo da indarrean.
Segurtasun Sailak azaldu duenez, azken egunetan sartutako Siberiako aire masa hotzaren eta Espainiako penintsula hegoaldetik iritsitako aire masa beroaren arteko elkarreraginaren ondorioa izango da elur aldia.
Euskalmet Euskal Metereologia Agentziak iragarrita zituen tenperatura baxuak, eta hala iritsi dira; batez ere, gaur goizaldean. Tenperatura maximoak gradu 1 eta 5 gradu artekoak izan ziren. Aire masa hotzak eta hodei ezak izotza ekarri zuten egunaren erdialdera eta gauean.
Elur maila ere itsas mailaraino jaitsi zitekeela iragarri zuen agentziak, eta bihar eguerdira arte hala gerta zitekeela azpimarratu zuen. Dena den, bihar arratsaldeko lehen orduetatik aurrera, «egoera aldatzen» hasiko dela aipatu du agentziak, eta elur mailak ere «azkar» egingo duela gora, 1.000 metro inguruan kokatuz. Eguna amaitzerako, 1.500 metro inguruan egongo da.
Zentzuz jokatzeko deia. Jakinarazpenak jakinarazpen, metereologia agentziak iragarpen eguneratuak jarraitzea gomendatzen du, Euskalmeten webgunearen zein Twitteren bitartez (@Euskalmet).
Halaber, herritarrei prebentzio neurriak har ditzaten eskatu, eta aholku eta gomendioak eman dizkie Segurtasun Sailak: esate baterako, «ahal izanez gero, garraio publikoa erabiltzeko eta mendiko txangoak bertan behera uzteko».
