Durango KT-ko Ainara Mugartegi eta Aiert Azkarate dominekin bueltatu dira Euskadiko Txapelketatik
Anoetako pista estalian (Donostia, Gipuzkoa) lehiatu zuten Euskadiko Txapelketa, zapatuan.
Ainara Mugartegi markina-xemeindarrak bi zilarrezko domina lortu zituen. 18 urtez azpikoetan, 400 metroko eta 200 metroko probetan sailkatu zen bigarren. Hala, bi aste barru Antequeran (Malaga, Andaluzia, Espainia) lehiatuko den Espainiako Txapelketarako gutxieneko markak eskuratu ditu.
Aiert Azkarate ondarrutarrak maila bereko pisu jaurtiketan irabazi zuen brontzezko domina.
Eskualdeko beste hainbat atleta daude talde durangarrean, eta horiek dominarik eskuratu ez arren, lan txukuna egin zutela azpimarratu du Orkatz Beitia Durango KTko entrenatzaile ondarrutarrak. Esaterako, kadete mailan Izaro Larrinaga markina-xemeindarra podiuma lortzetik hurbil egon zen; laugarren sailkatu zen pisu jaurtiketan. Kategoria bereko Xabat Oar-Arteta markina-xemeindarrak 60 metroko hesiko finalean sartu zen, eta marka pertsonala hobetu zuen: 10 segundu eta 02 ehuenen. Era berean, Neskuts Aldazabal berriatuarrak bere marka hobetzea lortu zuen gazte mailako 60 metro hesiko proban; 9 segundu eta 44 ehunen egin zuen.
Damian Ares junior ondarrutarrak (20 urtez azpikoa) 6 metroko luzera jauzian parte hartu zuen, eta kadeteetan (16 urtez azpikoa) Urtza Agirre eta Naroa Zabala ondarrutarrek 600 metroko proba lehiatu zuten. Azken horientzat lehen aldia izan zen pista estalian, eta entrenatzaileak adierazi du esperientzia hartzen doazela, eta eurek egindako lanagaz pozik dagoela.
Bestalde, Priscila Beitia ondarrutarrak gihar bikiak min hartuta dituenez ezin izan zuen Euskadiko Txapelketa jokatu. Luzera jauzian Espainiako Txapelketa lehiatzeko gutxieneko marka lortuta dauka, eta beraz, bertan parte hartu ahal izateko bi aste barrurako osatzea espero dute.
Ainara Mugartegi ezkerretik lehenengoa, podiumean.
Argazkia: Durango AT.
