Goizeko Izarra ikastolak jasoko du 2018ko Mutrikuko Berdel Aipamena
Zortzi ziren aipamen hori jasotzeko hautagaiak, eta herri bozketa egin ostean mutrikuarrak izan dira saria nork jaso behar duen erabaki dutenak. Guztira 519 bozka jaso dira eta horien %24a izan dira Goizeko Izarra ikastolaren hautagaitzarentzat, 124 bozka guztira. Euren atzetik Anaiarte, Kantuz Bizi eta Madalen abesbatzak eta Antonio Oianguren Okon geratu dira; bi hautagaitzen artean boto bakar bateko aldea geon da, eta bozken %15 eta %14 lortu dituzten hurrenez hurren.
Mutrikuko Turismo Bulegotik nabarmendu dute jasotako bozken %90a web orriaren bidez heldu direla, %7 izan direla Turismo Bulegoan bertan bozka eman dutenak eta %1 udaletxeko harreran eman dutenak.
Aurtengo irailean 50 urte beteko ditu Goizeko Izarra ikastolak, eta hautagaitza aurkeztearen arrazoietako bat hori izateaz gain, “garai hartan, herritar eta irakasle talde batek erakutsitako ausardia eta egungo ikastetxeak ematen dion jarraipena” saritu nahi izan dituzte. Berdel Aipamena udal pleno aretoan emango dute martxoaren 16an, barikuan, 20:00etan hasiko den ekitaldian. Herritar guztiei beratar joateko deia luzatu diete, merezitako aitortza jaso dezan ikastolak. Gaineratu dute Goizeko Izarra Ikastolako eragile ezberdinak joango direla aipamena jasotzera, “bai gaur egungoak eta baita ikastolaren lehen urteetako ordezkariak izan zirenak ere”.
Goizeko Izarrako ikasle eta gurasoak, iaz Zabielen egindako ekitaldi batean.
Goizeko Izarra ikastola.
