Mendexako dantza taldeak hile honetan hasiko du denboraldia
Hamarkada bateko ibilbidea egin du Mendexako dantza taldeak, eta hilabete honetan hasiko dira aurtengo saioekin.
Taldeari jarraikortasuna ematea da mendexarren helburua, eta dantza taldeko kide izateko gonbita luzatu diete bertako zein inguruko herritarrei. Ume zein nagusiak biltzen dira taldean.
Dantzan ikasi, edo aurretik ikasitakoaren bidetik trebatu nahi dutenek martxoaren 14a arte (eguaztena) dute izena emateko aukera. Horretarako, ondorengo telefono zenbakietako batera deitu behar da: 669 55 36 97 edo 94-684 21 06.
Martxoaren 18an hasiko dira probasaioekin. Hain zuzen, domekaro biltzen dira udaletxeko areto batean. 12:00etan hasita hiru ordu laurdenez aritzen dira umeak, eta 13:00ak aldera hasten dira nagusiak. Horiek ordubeteko probasaioa egiten dute.
“Talde sendoa osatzea lortu dugu, eta zeregin horretan jarraitu nahi dugu. Beraz, jendea gurekin dantzan ikastera animatzen dugu”, adierazi dute Mendexako dantza taldeko kideek.
Talde moduan orain dela hamar bat urte eratu arren, aurretik ere bazen herrian dantzan aritzen zen taldetxo bat. Hasieran herriko jaietan eskaintzen zuten saioa, baina, gaur egun, Mendexan ez ezik, inguruko herrietan edota, esaterako, Leatarren Egunean ere aritzen dira.
Dantza taldeko kideak.
Argazkia: Mendexako Dantza Taldea.
