Errausketa labeek sortzen duten kutsadura aztergai izan dute
Gorpu bat erretzean hainbat substantzia atmosferara aireratzen direla azaldu dute Garapen Jasangarriaren I. Jardunaldian. Espainian ez dutela ikerketarik egin dioteGarapen Jasangarriaren I. Jardunaldia egin zuten zapatuan. Izan ere, ehorztetxe batek er...
Gorpu bat erretzean hainbat substantzia atmosferara aireratzen direla azaldu dute Garapen Jasangarriaren I. Jardunaldian. Espainian ez dutela ikerketarik egin diote
Garapen Jasangarriaren I. Jardunaldia egin zuten zapatuan. Izan ere, ehorztetxe batek errausketa labe bat eraiki nahi du herriko industrialdean, eta ispastertar asko kezkatuta daude. Gure Herria Bizirik Ispasterko ingurumen elkarteak antolatutako saioan 30 herritar inguruk parte hartu zuten.Hildakoen gorpuak erretzeak kutsadura sortzen duela adierazi zuten. Funtsean, elkarteko kideek herritarrei errausketa labe bat herrian edukitzeak suposatzen duena azaldu nahi izan diete. Alegia, informazio guztia mahai gainean jarri nahi izan dute. «Gu ez gaude herrian enpresak kokatzearen aurka. Nahi duguna da herrian zein eskualdean kokatzen diren enpresak ingurumenarekiko jasangarriak izatea».
Hala, herrian zein Lea-Artibai mailan lanpostuak sortu ahal dituzten enpresa berriak ongietorriak direla diote. «Gaur egun nahikoa inguru osasuntsuan bizi gara, eta nahi ez duguna da inguruaren kalitate hori jaitsiko dituzten jarduerak kokatzea, batez ere, alternatibak egon badaudenean. Hemen kokatzen diren enpresak ahalik-eta garbienak izan daitezen nahi dugu».
Jardunaldia inolako asmo txarrik barik antolatu dutela esan zuten elkarteko kideek: «Guk nahi duguna da herritarrak informatuta egotea. Eta informazio osoa eskuartean daukatela, nork bere hautua egitea».
Ehorztetxeak Ispasterren errausketa labea egiteko prozedura hasi badu ere, udalak ez du oraindik herriko araudian aldaketarik egin. Aldaketa horiek halabeharrez egin behar dituzte mota horretako enpresa bat herrian kokatzeko. «Uste dugu oraindik garaiz gabiltzala».
Errausketa labeen inguruan mundu mailan egindako ikerketak azaldu zituzten adituek. Izan ere, elkarteak informazioa emateko hainbat eta hainbat aditu ekarri zituen. Eta horiek guztiek argi hitz egin zuten: «Gorpuak erretzeko sistema oso kutsagarria da. Ikerketa guztiek argi uzten dute hori».
Erretzen diren gorputzek osasunarentzako kaltegarriak diren substatziak edukitzen dituztela diote ikerketek. «Pertsona batek bere bizitza osoan hainbat substantzia pilatzen ditu, eta gorpua erretzen denean, horiek guztiak aireratu egiten dira».
Metal pisutsuak, dioxinak, merkurioa… dira osasunarentzat kaltegarriak diren eta gorpu bat erretzerakoan atmosferara aireratzen diren substantziak. «Enpasteak, protesiak, baltsamasio prozesuan erabiltzen diren osagaiak, estetika arloan erabiltzen den silikona, hildakoaren kutxak daukan barniza… Dena erretzen da». Barnizaren kasuan, gainera, erretzen denean oso toxikoa bihurtzen dela esan zuten adituek. «Minbizia sortzen du horrek».
Merkurioa
Zehaztu zutenez, Suedian eta Finlandian gorputz bakoitzeko 5-3,4 gramo merkurio aireratzen dira gorpu bat erretzen denean. «Espainian ez dago ikerketarik eginda. Ingalaterran, ordea, 1,5-4,5 gramo merkurio aireratzen dira; emisio guztien %11 erretzen diren gorputzen substantziak dira; urtean 1,23 tona merkurio zuzenean atmosferara doaz».
Ameriketako Estatu Batuetan, ostera, emisioak gutxiago direla diote. «Arlo horretan Europan baino hobeto egiten dute».
Horren guztiaren aurrean, gorpu bat hauts bihurtzeko bestelako alternatibarik existitzen dela esan zuten. Promessa izena daukan enpresak, hain zuzen, euren sistema azaldu zuen: «Ekonomikoki merkeagoa da, gutxiago kutsatzen du, eta gorpua hauts bihurtzen da».
