Berriatua eta Mutriku ariko dira zesta-puntako Euskal Ligako finalean
Berriatuko Zesta Eskolaren aldetik Roberto Lekue ondarrutarrak eta Antxon Alberdi etxebarritarrak jokatuko dute eta Mutrikuko Danok Bat taldetik, berriz, Ekaitz Mendizabal eta Mikel Manzisidorrek.
Bi bikoteek ligan lehen lau postuetan sailkatu ondoren lortu zuten Ohorezko Mailako finalerdietarako sailkapena. Mutrikuarrek ligan lehen postuan sailkatu ziren Gasteizko bikotea eduki zuten aurrean; 35-22 menderatu zituzten Aaron eta Suso Donostiako Karmelo Baldan. Eurekin batera, Berritxu zesta eskolako bikotea ere aritu zen beste finalerdian, eta hauek ere Gasteizko beste bikotea menderatzea lortu zuten.
Euskal Ligako finalak kutsu ezberdinetako puntisten arteko lehia kantxaratuko du. Batetik, puntista esperientziadunak arituko dira, Berritxu zesta eskolakoak, eta bestetik 18 urte baino ez dituzten puntista mutrikuarrak. Finala, Markina-Xemeingo pilotaren unibertsitatean jokatuko da zapatuan [martxoak 10], 17:30etik aurrera.
Hondarribian. Kadete eta gazte mailako finalak ere zapatuan [martxoak 10] jokatuko dira Hondarribian. Markina-Xemein eta Gernikako pilotariek jokatuko dute gazte mailako finala. Markina-Xemeingo Zesta Punta Eskolako Alex eta Danel eta Gernika Jai Alaiko Leke eta Unda aterako dira kantxara garaipenaren bila. Partidua 17:00etan hasiko da.
Markina-Xemeingo Unin jokatuko da finala.
