Inoiz baino arinago jokatuko da Mutrikuko Atxukale Saria
Mutrikuko Udalak antolatu eta Atxukale txirrindulari taldeak lagundutako 36. Atxukale Txirrindu Saria etzi [martxoak 17] jokatuko da, 16:00etatik aurrera. Aurten gainera, berritasun eta guzti dator proba. Izan ere, kirol probaren eguna maiatzetik martxora aldatu dute antolatzaileek, eta, hortaz, parte hartzaile gehiago izatea espero dute. “Bestelakoan azterketa egun eta asteekin bat etortzen zen proba, eta eguna aldatuta, jende gehiago batzea espero dugu”.
87 kilometroko ibilbidea duen kirol proban, bestalde, junior mailako hainbat txirrindularik parte hartuko dute. Lehen txirrindulariak 18:00ak pasatxo helmugara heltzea aurreikusten da, eta antolatzaileek azpimarratu dutenez, probak irauten duen tartean, errepidea itxita egongo da. Denbora tarte horretan «pazientzia pixkat bat izatea» eskatu diete herrietarrei. «Eskatu beharreko baimen guztiak ondo bideratuta daude. Lasterketa zaintzen dauden zirkulazio agente eta boluntario guztien aginduak jarraitzea eskatzen dizuegu».
Gaineratu dutenez, proban parte hartuko duten txirrindulariek «behar duten guztirako» kiroldegia zabalik izango dute, kirol ekitaldiak irauten duen denbora guztian.
