Leire Etxanizek Emakume Master Cup-eko finalerdia jokatuko du

2018/03/15

Erabakita daude Emakume Master Cup Txapelketako Promozio Mailako eta Lehen Mailako finalerdiak. Zortzi bikotek, hamasei pilotarik (11 gipuzkoarrek eta 5 bizkaitarrek) jokatuko dituzte partiduak domekan [martxoak 18], 11:30tik aurrera, Oñatiko pilotalekuan. Bi partidu izango dira maila bakoitzeko, eta Lehen Mailako finalerdietako batean egongo da Leire Etxaniz etxebarritarra Olatz Arrizabalaga gernikarragaz batera. Miren Larrarte (Bidania) eta Maider Mendizabal (Anoeta) gainditu beharko dituzte iazko txapeldunek, aurrera egiteko.

Leire Etxaniz pilotari ematen.

Lehen Mailako beste partidua Amaia Araiztegi (Mallabia)-Maddi Mendizabal (Zaldibia) eta Patri Espinar (Usansolo) eta Eneritz Arrieta (Azkoitia) bikoteen artekoa izango da. Promozio Mailan, bestalde, Alaitz Badiola eta Oihana Orbegozo azpeitiarrek Maddi Unanue azpeitiarraren eta Naroa Agirre zestoarraren aurka neurtuko dituzte indarrak lehenbizi. Hurrengo partiduan, berriz, Amaia Vicario azpeitiarrak eta Ainhoa Urien abadiñarrak osatutako bikoteak Nagore Aramendi eta Oihana Unanue izango dituzte aurkari. Jantziak. Astore enpresak beren-beregi egin dituen emakume pilotarientzako kirol-jantziak estreinatuko dituzte pilotariek Oñatin. Martitzen [martxoak 13] eguerdian aurkeztu zituzten arropak Laboral Kutxaren Bilboko egoitzan, eta bertan egon zen Etxaniz, Arrizabalagaz batera.

Emakume pilotarien jantzien aurkezpena. Gorriz jantzita Olatz Arrizabalaga eta Leire Etxaniz. Argazkia: Emakume Master Cup

Imanol Muñoz Astoreko marketin-zuzendariak ekipamendu berezi eta berritzaile hori sortzeko prozesuaren berri eman zuen. “Proiektu honi 2017ko uztailean ekin genion, emakume pilotariak azaltzen ari ziren premia eta iradokizunei erantzuteko. Izan ere, beraiek izan dira proiektuko protagonistak. Guk, Astoren, patroiak egin eta ehunak proposatu ditugu, baina emakume pilotariak arduratu dira prototipoak probatzeaz, eta feedbacka eman digute; horri esker, ekipamendu egokia diseinatu ahal izan dugu, euren premietarako egokia, alegia. Ez da bide erraza izan, baina badugu esperientzia pilotarientzako ekipamendua diseinatzen, Aspe eta Asegarce enpresetako pilotariak janzten baititugu duela zenbait hamarkadetatik. Baina egin beharreko zerbait zen hau, eta erronka horri heldu nahi izan genion”.