Metastasia txikitzeko ikerketa burutu du Iker Badiola ondarrutarrak
Ikerketa egin duen lan taldea. Argazkia: Laura Lopez/EHU Iker Badiola ondarrutarrak zuzendu duen ikerketa taldeak koloneko minbiziak eragindako gibeleko metastasia %80 txikitzea lortu du. Tumore-zeluletara iristen diren odol hodiak murriztu dituzte saguetan frogatutako terapia esperimental batean.
Hain zuzen ere, odol hodien hazkundea txikitu dute nanopartikula bidez EHUko Medikuntza eta Erizaintza Fakultateko Signaling Lab ikerketa taldeak eta Santiago de Compostela Unibertsitateko Farmakologia, Farmazia eta Teknologia Farmazeutikoa Sailak zuzendu duten ikerketan.
Iker Badiola bere taldeagaz. Ezkerretik eskumara: Iker Badiola, Gaskon Ibarretxe, Fernando Unda eta Joana Marquez. Argazkia: Laura Lopez/EHU
Zehatz esanda, nanopartikulak erabilita, gibeleko tumore zeluletara iristen diren odol hodietako zelulen hazkuntza geldotzea lortu dute, minbizi zelulei hazkuntza txikiagoa izan dezaten oxigeno eta elikagai-horniketa murriztuz.
Aurkikuntza horren atzean dagoen ikertzaile taldeak Iker Badiola Etxaburu ondarrutarra izan du buru. Zientziaren giltzak elkarteko kideak aitortu duenez, sei urte behar izan dituzte ikerketa burutzeko.
«Balio handikoa». 2012an hasi zuten ikerketa, eta guztira 11 ikertzaile aritu dira elkarlanean. Iker Badiolaren taldea zelulen portaeraz arduratu da, eta USCko taldea, berriz, nanopartikulen diseinuaz. Aldi berean, Biodonostia institutua, Dusserdolfeko Unibertsitatea, Bordeleko Unibertsitatea eta UPV/EHUko SGIker zerbitzuaren ikertzaileen laguntza ere izan dute.
«Minbiziaren aurkako beste ikuspegi» batekin egindako ikerketa dela aitortu du Badiolak. «Ildo beretik jarraituta, etorkizunean ikerketa honek beste minbizi kasu batzuetan ateak zabaltzea ekar lezakeela deritzot. Ikuspegi berri hau balio handikoa da, eta aukerak oraindik ere gehiago zabaltzen ditu minbiziaren inguruan».
Ikerketa egin duen lan taldea. Argazkia: Laura Lopez/EHU
Oraingoz, gaitzari aurre egiteko diseinatutako nanopartikulak eta horren inguruko ikerketa bi unibertsitateen artean patentatu berri dituzte. Hala ere, entsegu klinikoak beste batzuen esku daudela dio Badiolak. «Gure beharra honaino ailegatu da. Hurrengo pausoa entsegu klinikoak egitea izango litzateke, eta horretaz farmazia enpresak arduratzen dira; ez daukagu horretarako ez baliabiderik ezta jakintzarik ere. Ikerkuntza patentatuta dago, eta orain bazkide bila ari gara».
Ikerkuntza, gainera, International Journal of Cancer aldizkari entzutetsuan argitaratu berri dute. Sei urteren ostean lortutako emaitza argitaratzea lortzea ere «oso pozgarria» izan dela nabarmendu du. «Gure lana azkenean argitaratuta ikustea izugarria izan da. Horrelako aurkikuntza bat ezagutzera ematea garrantzitsua da, baina are eta garrantzia handiagoa dauka hori non argitaratzen duzun. Horrek gure lanari sekulako bultzada ematen dio».
