Iker Badiola ondarrutarrak zuzendutako ikerketa batek bi sari eskuratu ditu
Iker Badiolak zuzentzen duen taldeak Galiziako Errege Zientzia Akademiaren urteko zientzia lanik onenanaren saria eta Espainiako Farmakologia Elkartearen saria jasoko ditu urtarrilaren 23an, Santiagon (Espainia).
Iker Badiola laborategian, artxiboko irudian. Argazkia: Iker Badiola Iker Badiola zientzialari ondarrutarrak zuzendutako ikerketa batek Galiziako Errege Zientzia Akademiaren urteko zientzia lanik onenanaren saria eta Espainiako Farmakologia Elkartearen saria jasoko ditu urtarrilaren 23an, Santiagon (Espainia). Galiziako Errege Zientzia Akademiaren saria jasotzeagaz batera, taldeak 6.000 euroko diru saria ere jasoko du.
Badiolak zuzendutako ikertzaile taldeak, zehatz esanda, gibeleko tumore zeluletara iristen diren odol hodietako zelulen hazkuntza geldotzea lortu du nanopartikulak erabilita; modu horretara, minbizi zelulei oxigeno eta elikagai-horniketa murrizten zaie, tumoreak hazkuntza txikiagoa du. Koloneko minbiziak eragindako gibeleko metastasia %80 txikitzea lortu dute saguetan frogatutako terapia esperimental batean.
Ondarrutarrak zuzentzen duen EHUko Medikuntza eta Erizaintza Fakultateko Signaling Lab ikerketa taldeak eta Santiago de Compostela Unibertsitateko Farmakologia, Farmazia eta Teknologia Farmazeutikoa Sailak elkarlanean egin dute ikerketa.
2012an hasi zuten ikerketa, eta guztira 11 ikertzaile aritu dira elkarlanean. Iker Badiolaren taldea zelulen portaeraz arduratu da, eta USCko taldea, berriz, nanopartikulen diseinuaz. Aldi berean, Biodonostia institutua, Dusserdolfeko Unibertsitatea, Bordeleko Unibertsitatea eta UPV/EHUko SGIker zerbitzuaren ikertzaileen laguntza ere izan dute.
Gaitzari aurre egiteko diseinatutako nanopartikulak eta horren inguruko ikerketa, berriz, bi unibertsitateen artean patentatu zituzten. Espainia mailako patentea babestu ondoren, orain, patentea Europa mailan eta Ameriketako Estatu Batuetara zabaltzeko ahaleginetan ari dira. “Enpresa bat patente horretan sartzea falta zaigu orain. Guk bakarrik ezin dugu aurrera jarraitu, baliabide asko behar dira; hori dela eta, enpresa farmazeutiko indartsu baten laguntzaren bila ari gara. Zentzu horretan, hurrengo urtean kritikoak izango direla uste dut. Gure asmoa enpresa farmazeutiko batek ikerketan interesa jartzea da”.
