Zunbeltz Larrea ondarrutarra aske geratuko da astelehenean, 15 urte eta erdiko kartzela zigorra bete eta gero
Zunbeltz Larrea Azpiri preso politiko ondarrutarra astelehenean [martxoak 19] geratuko da aske. 15 urte eta erdiko kartzela zigorra bete ostean, astelehenean 08:00ak aldera irtengo du Castello de la Planako (Valentzia, Espainia) espetxetik. Euskal Herrira bueltan, berriz, bi harrera egingo dizkiote ondarrutarrari. Bata, Durangon (izatez bertakoa da), eta, bestea, Ondarroan. Durangoko harrera 18:30ean izango da Intxaurren, eta Ondarroakoa, berriz, 20:30ak inguruan, Alde Zaharrean.
34 urte ditu preso ondarrutarrak, eta ia bizi erdia eman du espetxean. Kartzeletu aurretik, hainbat aldiz atxilotu zuten. 2001eko martxoaren 5ean, 17 urte zituen, atxilotu zuen Ertzaintzak lehenengo bider, eta behin-behineko askatasunean utzi zuen epaileak hurrengo egunean.
Hurrengo atxiloketak, aldiz, 2002an izan ziren. Otsailaren 19an Ertzaintzak atxilotu zuen, eta Durangoko komisaldegian bi egunez eduki ostean, behin-behineko askatasunean utzi zuten ostera ere. Martxoaren 6an, berriz, Espainiako Polizia Nazionalak atxilotu zuen. Hiru egunez inkomunikatuta eduki ostean, 30.000 euroko bermea ordainduta aske utzi zuen Espainiako Auzitegi Nazionalak.
Hiru hilabetera, ekainaren 16an, atxilotzeko agindua eman zuen auzitegi berak, eta 40 egunez Alcala Mecoko (Madril, Espainia) kartzelan igaro ostean, uztailaren 24an, aske utzi zuten 12.000 euroko bermea ordainduta. Hilabete gutxira, azaroaren 12an, Ertzaintzak berriro atxilotu zuen. Bost egunez inkomunikatuta izan ostean, Valdemoroko (Madril, Espainia) kartzelan sartu zuten.
“Kale borroka eta talde armatuarekin kolaborazioa” egotzita 15 urte eta erdiko zigorra bete du Espainiako hainbat kartzelatan. Zehatz esanda, hiru kartzela zigor bete ditu horregatik: bost, sei eta lau urte eta erdikoak, alegia.
Zunbeltz Larrea preso politiko ondarrutarra artxiboko irudian. Argazkia: Hitza
