Zabalik dago Ondarroako Boga! mendi martxarako izen ematea
Aurrera Mendi Taldearen eta Zubi Zahar herri ikastolaren ekimenez apirilaren 8an egingo da aurten zortzigarrenez Boga! mendi martxa. Antolatzaileek adierazi dutenez, izena emateko epea zabalik daukate mendizaleek.
Internet bidez izena eman nahi dutenek apirilaren 5era arte izango dute horretarako aukera, Aurrera Mendi Taldearen webgunean. Ibilbide luzea edo motza egin nahi dutenek 13 euro ordaindu beharko dituzte izena Internetez emanez gero (15 euro, egunean bertan). Ibilbide txikiara joateko, berriz, 5 euro ordaindu behar dira.
Antolatzaileek nabarmendu dutenez, aurten bankuko txartelagaz egin beharko da ordainketa, “nahitaez”, eta ez kontu korrontea emanda. Probaren egunean, bestalde, ikastolan ipinita egongo den mahaian ere egongo da izena emateko aukera, martxa hasi baino ordubete arinago.
Probari dagokionez, Euskal Herriko iraupen ibilaldien zirkuiturako baliagarria da Ondarroa-Ondarroa martxa. Eta urtero legez hiru ibilbide izango ditu aukeran: luzea, motza eta txikia. Ibilbide luzeak 54 kilometro eta 2.400 metroko desnibela ditu. Horrez gainera, 47 kilometroko ibilbide alternatiboa egiteko aukera ere izango dute mendizaleek. “54 kilometro ordez 47 kilometro egiten dutenek ere Iraupen Luzeko ibilbiladien zirkuiturako puntu baliagarriak eskuratu ahal izango dituzte”. Motzak 24 kilometro eta 800 metroko desnibela ditu. Eta, txikiak, azkenik, 12 kilometro, 400 metroko desnibelagaz.
Gogorarazi dutenez, irteera ordu desberdina izango ditu ibilbide bakoitzak. Luzea egin nahi dutenek 07:00etan irtengo dute ikastola aurretik; ibilbide motzekoek 08:30ean, eta txikikoek, berriz, 10:30ean.
Antolatzaileek, gainera, bezperan lo egin nahi dutenentzako gelak prestatuko dituzte, eta martxa egunean gosaria emango zaie irteera puntuan. “Dutxatu nahi dutenentzat ere zerbitzua eskainiko da; helmuga puntuan eta Ondarroako kiroldegian”.
Parte hartzaile bat Ondarroako Boga mendi martxan izena ematen. Argazkia: Aurrera Mendi Taldea
Ondarroa Boga! mendi martxa. Argazkia: Aurrera Mendi Taldea
