Irrati txikiek eraberritzen ari direla erakutsi dute Ondarroan
Irrati txikietara ere heldu da ikerkuntza, garapena eta berrikuntza. Horren erakusle izan dira gaur [martxoak 24] Ondarroan egin diren Arrosa Sareko irratien zazpigarren topaketak. Irrati txikien bereizgarriak albo batera utzi barik, garai berriekin batera eraberritzen ari direla argi utzi dute landu dituzten tailerretan.
Egun osoko egitarauaren bitartez irratigintzan praktikoak diren gaiak landu, baina batez ere irratietako kideen arteko ezagutzak elkarbanatu dituzte. Software librearen erabilera irratian, ahozkotasuna, eskaleta bat zelan egin edo herri hedabideen funtzioa aztertu dituzte Radixu Irratian bertan eta Barnetegian egindako hitzaldi eta mahai inguruetan.
Gaurko ekimenen artean interes handiena eragin du RadioCloud automatizazio-softwarearen aurkezpenak. Irratiaren funtzionamendurako atal guztiak barneratzen dituen programa bat eratu du Radixu Irratiko Aritz Oleak, eta programaren nondik norakoak azaldu dizkie Ondarroako irratian bildutako guztiei. Irrati txikiek ere, eraberritze bidean, pauso handiak eman ditzaketela argi utzi du ondarrutarrak.
Ezagutzak partekatzeko, baina bai eta jai giroan jarduteko aukera ere eman du gaurko jardunaldiak. Gaztetxea izan da horretarako bilgunea. Bazkaria, kuña lehiaketako sari banaketa eta karaokea ere izan dituzte bertan.
Deialdia publiko orori zabalik bazegoen ere, irratigintzan diharduten Euskal Herriko irrati askotako ordezkariak batu ditu batez ere, gaurko ekimenak. Oreretako Zintzilik, Markina-Xemeingo EUP!, Gasteizko Hala Bedi, Zarauzko Arraio, Info 7 Irratia eta Bergarako Txapa irratietako ordezkariek, besteak beste, ez diote 7. topaketari hutsik egin. Anfitrioi lanetan jardun dute, Ondarroako Radixu Irratikoek.
Aritz Olea RadioCloud softwarea azaltzen Radixu irratian.
