Mutrikuko neska palisten txapelketarako izen ematea zabaldu dute
Mutrikuko neska palistak taldeak antolatuta, apirilaren 22an egingo da Mutrikuko I. Nesken binakako pala txapelketa azkarra. Antolatzaileek adierazi dutenez, gainera, zabalik dago txapelketan parte hartzeko izen ematea. Bertan parte hartu nahi dutenek kirola@mutriku.net helbide elektronikora idatzita eman beharko dute izena, apirilaren 14a baino lehen.
Txapelketan parte hartzeko interesa dutenek, bestalde, aurrelari edo atzelari bezala jokatuko duten zehaztu beharko dute izena ematerako orduan. Bikoteak antolakuntza berak sortuko ditu, izena ematen duten parte hartzaile guztiak kontuan hartuta. “Errendimenduari begira baino, benetako garrantzia, parte hartzeari eman nahi diogu. Bide batez, jai giroan ospatuko den ekitaldi honetan emakumea eta pilota, biak bat bezala suspertu nahi dira”.
Aldi berean, bazkaritarako txartelen erreserba egin ahal izango da, izena ematean. Egitarauari dagokionez, ordea, honakoa izango da; 10:30etik 14:00etara kanporaketak jokatuko dira. 14:15ean bazkaria egingo da, eta finala, 16:00etatik aurrera izango da.
