Musika eskolaren, bandaren eta UKKEME-ren kontzertuak, Mutrikun
Asteburuan musika emanaldiak izango dira nagusi Mutrikun. Guztira hiru musika emanaldi egongo dira aukeran.
Alde batetik Mutrikuko Udal Musika Eskolak eta Astigarragako Musika Eskolaren elkartruke kontzertua egongo da barikuan [apirilak 13], 19:30ean, Zabiel plazan. Eguraldi txarrarekin emanaldia Zabiel kultur etxeko ganbaran egingo da. 7 ‘terdik eta TTakun taldeek banakako saioa eskaini eta gero, Betagarriren Euri tanta bakoitzean abestia batera joko dute. Amaieran bi taldeek Gaztelugatxeko martxa joko dute, Mutrikuko Kte-sx taldearekin batera.
Bestalde, Mutrikuko Musika Bandak Udaberriko kontzertua eskainiko du zapatuan [apirilak 14], 13:00etan, Xiri Gunean. Eguraldi txarra egingo balu, emanaldi hau ere Zabieleko ganbaran egingo dela aurreratu dute.
Azkenik, zapatuan [apirilak 14] baita ere, Ondarroako Unanue Kamara Koralak eta Markina-Xemeingo Emeki Koralak osatzen duten UKKEME koralaren kontzertua egongo da. Saioa 20:00etan hasiko da, Komentuan, eta hamar pieza entzuteko aukera egongo dela esan dute.
UKKEME korala osatzen duten abeslariak. Argazkia: UKKEME
