Lea Ibarreko herritarrak udazkenean hasiko dira organikoaren bilketagaz
Lea Ibarra Udal Mankomunazgoan gertutik jarraitu dute Lea-Artibai Amankomunazgoaren organikoaren bilketaren esperientzia, eta euren proiektua bideratzeko lanean dihardute. Sitema desberdina izango dute, eta asmoa bilketagaz aurtengo urtean hastea da, udazkenean.
2.200 bizilagunen hondakinak batzen dituzte. Zaborra batzeko orain arteko kamioiak hamahiru bat urte ditu, arazoak ematen ditu, eta zahar geratu zaie. Kamioi berria eskuratzeko esleipen prozesuan daude.
Sistema guztia berrituko dutela azaldu du Mikel Ansotegi Jaio Lea Ibarrako Udal Mankomunazgoaren presidenteak. “Kontuan hartu behar da bost herri garela, eta bilketa egiteko 120 kilometro pasatxo egiten ditu kamioiak. Berriagaz, ibilbide berean bi trakzio batu ahal izango ditugu. Urrian edo azaroan hastea da gure asmoa”.
Hau da, orain arteko kilometro kopuru bera eginda, «hondar-trakzioa» deritzona, eta hondakin organikoa batu ahal izango dituzte, kamioi berriak bi konpartimentu izango dituelako. “Bilketa optimizatuko dugu horrela, buelta bakarrean bi hondakin mota batuko ditugu. Gero, horiek Milloiko trasferentzi gunera eroango dira hondakin denak”, esan du Ansotegik.
“Aldebiko sistema” edukiko du, eta garabiduna denez, alde batean zein bestean dauden edukiontziak batuko ditu. Kartoia batzea ere aurreikusi dute, eta edukiontzi horietan pilatutakoa batu gura dute. “Garbikerrek du ardura hori, eta eurekin batuko gara zer egin zehazteko”. Lea Ibarrako Udal Mankomunazgoko ordezkarien helburua “birziklapen tasa igotzea” da, Europak ezarritako kopuruetara heltzea da, edo ahal izanez gero, hobetzea. “Gutxienez %60 hori lortu gura dugu”. Bost udalerrien artean adostu dutenez, txip bidez funtzionatuko dute edukiontziek. Organikoa egun jakin batzuetan utzi beharko dute herritarrek. “Premien arabera aztertuko da. Plan bat eginda dugu, baina, gero errealitateak esango digu ezer aldatu edo egokitu beharko dugun”. Sistema erosoa izango dela-eta, herritarrek ondo erantzungo dutela uste dute. “Gero eta kontzientziatuago gaude”. Adituen aholkuak. Spora ingurumen zerbitzuko adituen aholkuei jarraituz, zabor mota guztiak batzeko guneetan edukiontzi mota guztiak jarriko dituzte, eta dagoeneko gune horiek zeintzuk izango diren zehaztu dute. “Euren esperientziak eta errealitateak erakusten du, herritarrek zabor edukiontzi bat hurbil badute, eta birziklatzeko edukiontzia urrunago badago, batzuk kontzientziatuta egon arren, beste askok ohiko edukiontzietan uzten duela mota guztietako zaborra”.“Birziklapen tasa igotzea da helburua; gutxienez %60 lortzea”
Gune horietan, beraz, kolore guztietako ontziak egongo dira: “Auzo guztietara heldu gura dugu; nahi dugun leku guztietara ezingo gara heldu, baina auzo guztietan gutxienez puntu bat egongo da. Edukiontzi gutxiago, baina dauden lekuetan denak egongo dira, herritar denek birziklatzeko aukera izateko”.“Herritar denek birziklatzeko aukera izatea gura dugu, auzo denetara helduz”
