Kaxero Gaupaserok jaia ekarri du Berriatura

2018/05/05

Kaxero Gaupaseroren jeitsieragaz hasi dituzte jaiak gaur [maiatzak 5] Berriatuan. Estreineko aldiz, goizez etorri da jaietako protagonista herrira, eta musika eta dantza giroz bete du plaza. Eliza ondotik jaitsi da Kaxero Gaupasero Tarine Musika Eskolako musikari gazte eta nagusiagoekin lagunduta. Kalejira alaian zeharkatu dute herria plazaraino.

Kaxero Gaupaseroren jaitsiera.

Kaxero Gaupaserok udaletxeko balkoian bere tokia hartutakoan jai hasierako pregoia bota dute Bizilagunak programako kideek. Programa horren bidez bazkari baten inguruan elkartu dira aurten jatorriz bertokoak direnak eta beste herrialde batzuetatik etorritakoak. “Kultura eta etxe ezberdinetako jendea batu gara eta elkar ezagutzeko aukera eduki dugu”, esan dute. Jaietan ere aldaketei eta aukera berriei lekua egiten jarraitzeko gonbitea egin diete herritarrei, eta herria piztu, kolorez jantzi eta gozatzera animatu dituzte. Azoka Eguna. Sangregorioen hasieragaz gainera, Azoka Eguna ere ospatu da gaurkoan. Danetara 24 ekoizleren postuak egon dira ikusgai plazan. Ahateki, gazta, ogi, gozo, ezti, landara, kontserba eta elikagai ekologikoak aurkitu ahal izan dituzte azokazaleek besteak beste. Artisautza, Gure Esku Dago, Zapran Gagoz eta Guraso Elkartearen postuek ere osatu dute azoka.

[zuzenean ARGAZKI GALERIA IKUSI]

Gaurkoan, baina, arrakastarik handiena Elkarteen arteko V. Pintxo lehiaketak eduki du. 12:30ean hasi da dastaketa eta ordu bete igaro orduko desagertuta zeuden mahaietatik elkarteek prestatutako mokadutxoak. Bost elkartek parte hartu dute lehiaketan: Berriatuko Anaitasuna Jubilatuen Elkarteak, Ondarruko Ezkilantzarri Elkarteak, Milloi Auzo Elkarteak, Goxalde Elkarteak eta Kukulumutxuk. Berriatuko Udalak atuna eta antxoa eman dizkie eta hortik aurrera, imajinatu duten guztia eraman dute sukaldera. Pintxo ikusgarriak prestatu eta eskaini dituzte. “Maila handikoak” izan direla eta “ikaragarri gozoak” egon direla azpimarratu dute dastatzaileek.

[zuzenean ARGAZKI GALERIA IKUSI]

Urtero parte hartu dute Berriatuko jubilatuen elkartekoek lehiaketan eta aurten bost pintxo mota ezberdin prestatu dituzte; Ondarroako Ezkilantzarrikoek ere bost pintxo mota ezberdin prestatu dituzte, hirugarren urtez parte hartu dute lehian eta iazko irabazleek bi pintxo berri egin dituzte aurten. Milloi Auzo Elkarteko zazpi lagun ibili dira gaurko pintxoak prestatzen eta 300 bat pintxo egin dituzte. Goxalde Elkartekoen fritoek arrakasta handia izaten dutela eta, 200 egin dituzte gaurko azokarako eta oraingoan ere ez da eskatzailerik falta izan. Juan Arriola Astobitze eta Eugenio Gojenola ibili dira sukaldari lanetan. Azkenik, Kukulumutxu taldeko hamar lagunek lau pintxo ezberdin prestatu dituzte, guztiak ikusgarriak, esate baterako, baso batean Pisako dorrea prestatu dute eta berehala desagertu dira ontzitxoak mahaitik. Elkarte horietatik guztietatik bat saritu dute dastatzaileek. Zortearen arabera, pintxoak dastatzeko txartelak erosten dituztenetako batzuk izendatzen dituzte balorazioa egiteko, eta gaurkoan puntuaziorik altuena Ezkilantzarrik eduki du, eta beraz, aurten ere eurek izan dira lehiaketako irabazleak.