Euskal Eskola Publikoaren jaia «guztiona» dela aldarrikatu dute
Euskal herritar guztiak gonbidatu dituzte ikasleak protagonista izango dituen ekainaren 3ko jaira. Ekitaldiari babesa eman dieten guztiei eskerrak eman dizkieteZapran gagoz lantaldea azken txanpan sartu da. Ekainaren 3an Lekeition ospatuko den Euskal E...
Euskal herritar guztiak gonbidatu dituzte ikasleak protagonista izango dituen ekainaren 3ko jaira. Ekitaldiari babesa eman dieten guztiei eskerrak eman dizkiete
Zapran gagoz lantaldea azken txanpan sartu da. Ekainaren 3an Lekeition ospatuko den Euskal Eskola Publikoaren jaiaren atarian, lantaldeak eskola komunitatea osatzen duten guztiekin agerraldia egin zuen barikuan, Lekeitioko Independentzia plazan. Oro har, euskal herritar guztiei ekainaren 3an Lekeitiora joateko gonbitea egin zieten, «eskola publikoaren eta euskararen jai hau guztiena delako». Halaber, jaiko protagonista nagusiak Euskal Eskola Publikoko ikasle guztiak direla azpimarratu zuten. «Ongietorria izango da alaitasunez ondo pasatzeko gogoz eta errespetuz etortzen den guztia».Azaroan jaiaren aurkezpena egin zutenetik orain arte egindako ekintzak errepasatzeaz gain, jaiagaz bat egin, mezua zabaldu edota babesa eman dieten guztiei eskerrak emateko baliatu zuten agerraldia. «Antolatutako ekintza guztietan Lekeitioko herritar, elkarte eta erakunde guztien aldetik edukitako languntza eskertu nahi dugu: udala, kultur eta kirol elkarteak, komunikabideak, alor ezberdinetako pertsonak…».
Zapran gagoz abestiaren bideoklipak edukitako arrakasta ere aipatu zuten. Eta, zelan ez, bideoa egin duen Xabier Villalba Traolako arduradunari eskerrak eman zizkioten. «Lan ederra egin duzu, artista!». Bideoak hilabete eskasean 27.000 bisita baino gehiago eduki ditu. «Bideo hori egiteko asko eta askoren laguntza ezinbestekoa izan zen. Eta kantuaren eta bideokliparen aurkezpenean Ikusgarri aretoa bi aldiz bete zen».
Haurrei begira
Zapran gagoz leloa aukeratzeko prozesua ere gogora ekarri zuten, eta 100 proposamen baino gehiago jaso zituztela aipatu zuten. Hautaketa bozka bidez egin zuten, eta Xabat Agirre diseinatzaile ondarrutarrak haurrek egindako marrazkietan oinarrituta diseinatu zuen irudia. «Hau guztia eskolako guraso, irakasle eta ikasleei esker izan da, bidea ere helburu dugulako. Gure haurrentzat desio dugun hezkuntza eredua etengabe elikatu duen parte hartzea eta elkarlana bilatu ditugulako. Gure haurren beharrizanak antzeman eta esparru berriak sortzeko aitzakia ere bihurtu dugu ekainaren 3ko jaia. Hori jai eguna bera bezain garrantzitsua da guretzat».
Egunotan komunikabide ezberdinetan ikusi ahalko den iragarkia ere estreinatu zuten. «Ez da lan erraza izan, sekulako koordinazioa eskatu duelako, eta parte hartzaile guztiek erraztasunak eman dizkigute». Aurpegi ezagun asko ikusi ahalko dira bertan.
