Etzi amaituko da Aulestiko ipuin topaketara lanak aurkezteko epea
Urzabal Guraso Elkarteak 2018ko Ipuin Topaketa egingo du Aulestin, eta LH1etik 18 urtera arteko aulestiarrek parte hartu dezakete. Gaia librea izango da, eta barikuan [ekainak 1] 19:00etan amaitzen da lanak aurkezteko epea.
Urregarai eskolako umeek irakasleei eman behar dizkiete lanak. Eskolako ikasle ez direnek urzabalgurel@gmail.com posta elektronikora bidali behar dituzte. Ipuinak marrazkiez apainduta bidali daitezke.
Parte hartzaileek euren izen-abizenak, posta elektronikoa eta adina zehaztu behar dituzte ipuinean zein marrazkian.
LH1 eta 2 mailetako ikasleek ipuinak boligrafo edo errotulagailu beltzagaz idatzi behar dituzte. Eskolan banatu dizkieten txantiloietan idatziko dituzte, eta nahi duenak bertan jar dezake marrazkia. LH3tik aurrerakoek ordenagailuz idatzi beharko dituzte.
Ipuinak dauden bezala inprimatuko dituzte (izenik gabekoak ez dituzte inprimatuko). Halaber, zuzenketek eginda egon beharko dutela eta epez kanpo emandako lanak ez direla sartuko jakitera eman dute.
Sari banaketa ekitaldia ekainaren 23an 13:00etan egingo dute. Parte hartzaile guztiek jasoko dute saria eta agiria.
Iazko ipuin topaketaren parte hartzaileak, sanjoanetan egindako sari banaketan.
