Tarinek ikasturteko azken entzunaldia eskainiko du Markina-Xemeinen
Guztira zazpi entzunaldi eskainiko ditu Tarinek Markina-Xemeinen, eta zazpigarrena astelehenean izango da. Joan den astean bost eta seigarren entzunaldiak eskaini zituzten: flauta, gitarra eta tronpeta, eta saxofoi eta trikitia; 20 ikasle inguru aritu ziren. Horiek oso ondo joan zirela esan dute.
Bada orain, astelehenean [ekainak 4], piano entzunaldia egongo da aukeran. Bi saio eskainiko dituzte Tarinek Kontzekupean daukan lokalean: 17:30ean eta 19:00etan. Horietan ere 20 ikasle inguru ariko dira, eta errepertorio zabala eskainiko dutela esan dute. “Estilo guztietako abestiak joko dituzte, tartean abesti herrikoiak ere bai”. Emanaldi bakoitza ordu erdi ingurukoa izango dela esan dute, eta herritar guztiak saioak ikustera gonbidatu dituzte.
Ikasleen adinari dagokionez, gazteak izango dira denak: 7 urtetik 17 urte ingurura artekoak ariko dira.
Azken emanaldia izanda, Tarinekoek orain arteko entzunaldien balorazioa egin nahi izan dute. “Oso pozik gaude emanaldiek eduki dute oihartzunagaz. 100 ikasletik gora aritu dira, eta ikusleak ere asko izan dira. Beraz, ikasturtean egindako entzunaldien balorazio positiboa egiten dugu”.
Astelehenekoa egin eta gero, Tarinek Udaberriko emanaldi “potoloa” egingo du ekainaren 14an Markina-Xemeinen, eta horrekin hurrengo ikasturtera arte agur esango dute.
