BIA-ren jardunaldiek arkitekturaren mundua hurreratuko dute Markina-Xemeinera
Paisaia Produktibo berriak izenpean Bilbao Bizkaia Architecture plataformak (BIA) egingo duen III. Urban Regeneration Forum jardunaldien baitako arkitekturari buruzko jardueretako bat ailegatuko da bihar [ekainak 13] Markina-Xemeinera. Izan ere, lehen aldiz, Bilbotik irten eta Bizkaiko zenbait udalerritara hedatuko dute egitasmoa, eta aukeratutako udalerrietako bat Markina-Xemein izango da.
Hortaz, arkitekturaren mundu liluragarrira hurbildu ahal izango dira markina-xemeindarrak, herriko bertako berezitasun bat landuko duen hitzaldiren bidez. Bertoko baliabidea: Markina-Xemeingo minerala izeneko hitzaldia eskainiko du 18:30ean, Uhagon kulturguneko erakusketa gelan, Urtza Uriarte Otazua Bizkaiko EHAEO-COAVNeko arkitektoak.
Horrez gain umeentzako tailerra ere emango dutela jakitera eman dute, Natura-Ciudad-Naturaleza-Hiria Markinako Bekobenta Herri Eskolan.
Herrietatik igaro ondoren, Bizkaiko hiriburuak hartuko du lekukotza zapatutik [ekainak 16] ekainaren 22ra arte. Biltzar zientifikoak nazioarteko adituak bilduko ditu Bizkaia Aretoan, ikasle eta arkitekto gazteei zuzendutako Ideien III. Nazioarteko lehiaketa deitu dute, eta egitarauaren baitan publiko guztiei zuzendutako ekimenak ere egongo dira: bisita gidatuak itsasontziz eta bizikletaz, familia osoari eskainitako tailerrak, helduentzako eta ume eta gazteentzako marrazki lehiaketak eta lau erakusketa.
Zurro, Quintana, Cañada, Iturbe, Acasuso eta Garcia BIA-ko eta erakundeetako ordezkariak III. Forumaren aurkezpenean. Argazkia:BIA
