Salazoi Txapelketa ospatuko dute sanpedroetan Lekeition
Herriko salazoirik ederrena aukeratuko dute ekainaren 30ean Lekeition ospatuko duten Salazoi Txapelketan. Edozein nagusik parte hartu ahal izango du urteroko hitzordu gastronomikoan, banaka, binaka edota talde edo elkarte moduan ere. Bertan parte hartzeko, baina, Guria tabernan eman behar da izena ekainaren 29ko 12:00ak orduko.
Independentzia plazan batuko dira aurten salazoirik hoberena izateko lehian parte hartuko dutenak. Antolatzaileek oinarrietan jarri dutenez, parte hartzaile bakoitzak salazoi lagin bat bakarrik aurkeztu ahalko du, eta laginaren gutxieneko kopurua 12 xerra izango dira. Lagina tuper batean Guria tabernara eraman beharko dute lehiaketa baino 24 ordu aurretik.
Urtero modura, salazoi ekoizle eta sukaldariez osatuta egongo da epaimahaia, eta 14:00etan jakinaraziko dute ebazpena. Sari banaketa ere ordu horretan egingo da, eta berdinketarik balego, dagozkien lagin bakoitzetik beste hainbeste filete atera eta dastatuko dituztela zehaztu dute antolatzaileek “irabazlea izendatu ahal izateko”.
Lekeitioko emakume batzuk antxoa zelan gazitzen den erakusten limoneruetan.
