Sanpedroetako ohiturek indartsu darraite Lekeition

2018/06/29

Dei eittekuekin esnatu dira gaur [ekainak 29] lekeitiarrak; kalez kale ibili dira andra, gizon eta gaztetxoak ere herritarrei altxatzeko dei eginez. Emozioz beteta hasi dutela eguna azaldu dute batzuek, aspaldiko ohitura gogoan. Jaietako egun nagusia izan dute gaurkoa, tradizioz betetako eguna, eta urtero bezala gogoz hartu dituzte antzinako dantza eta prozesioak. San Pedropea eta plaza bete dituzte herritarrek eta bisitariek, Kaxarranka eta Lekeitioko Andren Aurreskua ikusteko.

[zuzenean ARGAZKI GALERIA IKUSI] – [EGITARUA]

Ohiturari eutsiz, Lekeitioko Udaleko alkate eta zinegotziek prozesioa egin dute kofradiako lehendakari eta arduradunekin batera udaletxetik elizaraino, Lekeitioko Musika Bandak lagunduta. Joseba Agirretxea eta Idoia Sagastizabal Espainiako Kongresuko diputatuek, Jose Maria Cazalis senatariak, Ibone Bengoetxea eta Lorea Bilbao diputatuek, Josu Unanue EH Bilduren batzar nagusietako bozeramaleak, Joseba Gezuraga batzarkideak, Pello Urizar eta Jasone Agirre legebiltzarkideek eta inguruetako herrietako alkateek ere parte hartu dute ekitaldian. Meza ostean berriz, eliz eta erakundeetako arduradunek San Pedroren irudia porturaino eraman eta hango irudiaren aurrean Kilin Kalakoa edo uretara botatzeko keinua egin dute, ohi modura. San Pedropean geldialdia eginda udaletxera abiatu dira.

[zuzenean ARGAZKI GALERIA IKUSI] – [EGITARUA]

Usadioei jarraituz, Asier Uskola hiru bidar igo da gaur, Kaxarranka gainera. San Pedropean, Kofradia aurrean eta plazan egin du dantza ikusgarria, ikusleen irrintzi eta txalo artean. Bien bitartean, Eguzki dantza dantzatu dute Etorkizuna dantza taldeko dantzariek, plazan. Gonbidatu berezia atera dute gaur, gainera; beste batzuen artean, Koldo Goitia Lekeitioko alkateak egin du soka dantza.

Erlazionatutako edukiaARGAZKI GALERIA: San Pedro Eguna 2018, Lekeition