Giro ikusgarriagaz gozatu dute Markina-Xemeingo San Martin ermitako jaietan

2018/07/03

Dantza solte txapelketa, umeentzako jolasak eta karta jokoak egon ziren aukeran, besteak beste, domekan [uztailak 1] Markina-Xemeingo San Martin ermitako jaietan. Beste urte batez, egitarau oparoa prestatu zuten San Martin Kofradiakoek egunari ukitu berezia emateko, eta beso zabalik hartu zituzten, oinez zein autoetan, paraje ederragaz eta jaiagaz gozatzera hurreratu ziren guztiak.

Dantzariak taula gainean dantzan. Argazkia: San Martin Kofradia

Ohi modura, aurreskuagaz hasi zuten eguna, eta nagusien dantza solte txapelketari hasiera eman zioten ondoren. Ikustaldia eskaini dute dantzariek aurten ere, eta aurtengo irabazleak Ane Urruzola (Billabona) eta Iker Sanz (Lezo) izan dira. Horrela geratu ziren sariak:

Ane Urruzola (Billabona) eta Iker Sanz (Lezo).
Larraitz Larrañaga eta Amets Amubieta azpeitiarrak.
Maider Arrieta eta Jon Ander Iriondo azpeitiarrak.
Irati Lopez eta Gorka Granado sopelarrak.

Dantzariek oinak astintzen zituzten bitartean paellei azken osagaiak gaineratu zizkieten Paella Txapelketako parte hartzaileek. Lau lagunek osatu zuten epaimahaia eta guztiak dastatu ostean, lehenengo lau paella onenak aukeratu zituzten. Sumiña, San Martin, Eskaut eta Lomiño eta lagunek taldeek Barrenetxek emandako barazki sorta izan zuten opari.

Epaimahaia paellak dastatzen. Argazkia: San Martin Kofradia

Jokoan. Arratsaldeko euria ere ez zen aitzakia izan ondo ez pasatzeko. Saku lasterketan, patatak eramaten, dantzan… gozatu zuten umeek.

Umeen jolasak. Argazkia: San Martin Kofradia

Eurik ihesi, nagusiak ere ermita barruan eta haren aterpean jokatu zuten kartetan, bazkalostean. Jose Barenda 34. Mus Txapelketako irabazleak Plaza eta Arrate izan ziren, bigarrenak Anitu eta Isidro, hirugarrenak Kepa eta Iñaki eta laugarrenak Zabala eta Meabe. Briska Txapelketan, ostera, Javier eta Mari Tere izan ziren nagusi, bigarren Idoia eta Eli gelditu ziren, hirugarren Lolita eta Martin eta laugarren Arantza eta Julian. 150 euro eta txapelak, 100 euro, 80 euro eta 50 euroko sariak eraman zituzten etxera Mus zein Briskako lehen laurek hurrenez hurren.

Mari Tere eta Javier Briskako txapeldunak, jai batzordeko kideagaz. Argazkia: San Martin Kofradia

Eta egunari amaiera emateko, jaietako zozketa egin zuten. Aurtengo zenbaki saritua 579 izan da eta San Martin Kofradiakoek azaldu dutenez, Olatz Basterretxea Itxurrixari irten zaio.