Canada BC Bike Race egingo dute Helmugak proiektuko kideek
Helmugak Eusport proiektuko bost kide mundu mailako beste proba bat egiten hasiko dira zapatuan [uztailak 7]: Canada BC Bike Race lasterketa. Zazpi etapatan banatuta, zazpi egunetan 321 kilometro egingo dituzte txirrindu gainean. Ondokoak dira proba egingo dutenak: Ander Txakartegi (Berriatua), Xabat Arrate (Markina-Xemein), Iban Amias (Ispaster), Oier Aurrekoetxea (Bermeo) eta Joseba Albisua (Zumarraga).
Bostak Kanadara bidean doaz, eta ordu aldaketagaz, eguen iluntzerako [uztailak 5] ailegatuko dira. Ilusioz beteta eta ondo pasatzeko helburuagaz doazela esan dute.
Txirrindu gainean jarri eta kilometroak egiten abilak badira ere, proba hau «oso gogorra» dela diote. «Oso teknikoa da, eta etapa batzuetan ere desnibel handia dago. Lasterketa egin zuen batek esan digu benetan gogorra dela», dio Txakartegik.
Besteak beste, Titan Desert eta Mongolia Bike Challenge probak egindakoa ere bada Txakartegi, baina Kanadakoa guztiz ezberdina dela iragarri du. «Basoetan barrena ibili behar gara txirrinduagaz, eta ibilbidea ez dago asfaltatuta; sustrai artean eta abar ibili behar gara. Diotenez, paisaia ikusgarriak ikusiko ditugu».
Guztira, 36 herrialdetako 650 txirrindularik egingo dute lasterketa. «Izen-ematea zabaldu eta 23 ordutan leku guztiak bete ziren».
Batazbeste, etapa bakoitza hiru eta sei ordu bitartean egingo dute. «Nik uste gu lau eta bost ordu tartean ibiliko garela». Parte hartzaile guztien artean gizonezkoak dira gehienak (%85).
Aurretik Mongolian eta Marokon egindako probetan ez modura, oraingoan tenperaturak nahikoa baxuagoak izango direla esan du. «28 eta 30 gradu inguruko tenperaturetan ibiliko gara, eta baso barruan ibiliko garenez, han freskoago egoten da eta nahikoa ondo ibiliko garela uste dugu».
Desnibel handiena daukan etapa 4. etapa bada ere (1.768 metro), zailena azken etapa izango dela esan du Txakartegik. «Aurreko urteetan azken etapa horrekin hasten zen lasterketa. Aurten, baina, azkenerako utzi dute».
Azken eguneko asmoa. Bostak batera joango direla esan du Txakartegik. «Gu proba egitera eta ondo pasatzera goaz, eta nahikoa batuta joango gara etapa guztietan».
Etapa guztiak eginda, eta etxerako bidea hartu aurretik, bestelako asmorik ere badaukatela argitu dute. «Uztailaren 14an Vancouverren bizi diren euskaldunak batu egiten dira, eta gure asmoa da egingo duten jai edo parrilladara ailegatzea».
Txirrindu gainean ordu asko pasatakoak dira bostak, eta mendirik garaienak edo kilometro asko eta askoko ibilbideek ere ez dituzte beldurtzen. Hori bai, azken denboraldian topera entrantzen ibili direla diote.
Txakartegi, Berriatuko plazan.
