Carlos Romero ondarrutarrak irabazi du Lekliktxoren argazki rallya
Lekeitio, Ondarroa, Durango, Zaldibar eta Barakaldoko 11 argazkizalek parte hartu dute Lekeitioko Lekliktxo Argazki Elkarteak antolatutako 2. Argazki Rallyan. Argazki album onenaren saria Carlos Romero ondarrutarrak eraman zuen eta bigarren eta hirugarren postuak Iñaki Garabilla eta Ibon Noya lekeitiarrentzat izan ziren. Era berean, rallyko argazki onenaren saria ere Carlos Romerorentzat izan zen.
Lehiaketa Untziola egur lan taldeagaz elkarlanean egin zuten, San Pedroen egitarauaren barnean. Hori dela eta, parte hartzaileek, aurten, Untziolako kideekin kofradian bertan bazkaltzeko aukera ere izan zuten. «Giro aparta, kontzertu txiki bat eta solasaldiaz gozatzeko aukera» esan dute antolatzaileek.
Argazki Rallya 09:00etan hasi zen, eta Lekliktxoko kideek azaldu dutenez, argazkilariei hiru gai eman zizkieten eta bakoitzetik hiru argazki atera behar izan zituzten: «Lehenengoa itsas ondarea, San Pedroetan egiten diren ekintzei esker sortzen diren aukerez baliatuz, Euskal Herriko VI. Zingan txapelketa edota Enbarkazio tradizionalen itsasoratzea. Bigarren gaia, fauna eta flora, Lekeition aurkitzen diren landare, zuhaitz eta animalia ezberdinen irudiak bilatzera sustatuz. Eta azkenik, forma geometrikoak, egunerokotasunean ikusten ditugun objektuen beste ikuspegi bat bilatzeko helburuagaz».
