Jaien testuinguruan gertatzen diren emakumeen kontrako erasoak landuko dituzte Markina-Xemeinen
Jaixek eta erasuek izeneko tailerra antolatu du Bagaittun emakume taldeak Markina-Xemeingo Karmen jaien atarian. Txosna guneko eragileei, txandetan parte hartzen dutenei eta oro har txosnagunera zer edo zer hartzera hurreratzen diren guztiei bideratuta dagoela azaldu dute.
Eguenean [uztailak 5] 19:00etan, gaztetxean egingo den tailerrean jaien testuinguruan gertatzen diren emakumeen kontrako erasoak landuko dira. «Erasoak modu orokorrean hartuta, ez bortitzak bakarrik, oharkabean gertatzen diren horiek, eta egoera eta jarrera matxistak ere bai», zehaztu dute. Jai giroan zer edo zer gertatzen denean zelan jokatu edo zelan erantzun aztertzea eta lantzea da tailerraren helburua. «Hasieran azalpen bat emango dugu testuinguruan kokatzeko eta ariketak egingo ditugu ondoren. Amaieran, orain arteko protokoloa irakurri eta zalantzak argitzeko tartea zabalduko da».
Txosnaguneko eragileen artean protokoloa landuta daukatela azaldu dute. “Txanda aldaketetan protokoloaren azalpena ematen da. Baina momentuko urduritasunaren eraginez uste dugu ez zaiola behar bezalako garrantzirik ematen. Hori dela eta, jai egunetik ateratzea erabaki dugu beste lasaitasun bategaz landu ahal izateko”.
Horrez gain, lan hori guztia eragileen artera mugatu barik jende guztiari zabaldu, zalantzak argitu eta partekatzeko aukera eskaintzea izan da Bagaittunen asmoa. “Zenbat eta jende anitzagoak parte hartu orduan eta aberatsagoa izango da tailerra”. Hala ere, ariketetan parte hartu nahi ez duena eta soilik entzutera joan nahi duena ere ongi etorria izango dela azpimarratu dute, tailerrera hurreratzeko gonbitea luzatuz.
Txosna gunea jendez beteta Karmen jaietan.
