Dena prest daukate Iturretan Kristobal Deunaren jaiak ospatzeko
Markina-Xemeindik Iturreta tontorrerainoko martxagaz hasiko dira domekan [uztailak 8] Kristobal Deunaren ospakizunak. Arkupe aurrean batuta, Iparragirretik gora abiatuko dira ibiltariak Itxurrixa eta Laitxu ondotik igarota Iturretara heltzeko. Dena prest aurkituko dute bertan, auzoko jai batzordeak txukunduta dauka ingurua jada.
Urteroko hitzorduari eutsita, aurten ere, goizetik iluntzera arteko egitaraua prestatu du Iturretako jai batzordeak Kristobal Deunaren jaietarako. Urteroko ekimenak mantendu eta berriekin osatu dute egitaraua. Horrela meza egongo da 11:00etan, eta ermita atetik bada ere, autoen bedeinkapenik ez da faltako.
Ermita ondoko probalekuak zaldi biren arteko norgehiagoka hartuko du goizean. 20 minutuko saioan Patxua tabernaren Itzu zaldiak daukan marka gainditzen saiatuko da auzoko Adorrixa, Saleroso zaldiagaz. Arratsaldean, ostera, Kristobal Deunaren 49. idi probak lehiatuko dira. Hiru idi pare aterako dira probalekura: Bolibarko Zubibarrirenak, Errezilgo Mendiolarenak eta Errezilgo Ezkudun anaienak. 1.000 euroko sariak, estalkiak eta garaikurra eramango ditu irabazleak.
Ohi modura, landan egingo dira, umeentzako txapel jaurtiketa eta 14 urtetik gorakoentzako txinga jaurtiketa norgehiagokak. Trebeenek sariak edukiko dituztela azaldu dute antolatzaileek. Bestalde, umeentzako puzgarriak egongo dira egun osoan, eta lehenengo aldiz Arantza eta Pantxoren kantaldia, 16:00etatik aurrera.
Nahi dutenek, gainera, egun pasa egin eta Iturretako Beti Jai elkartean bazkaltzeko aukera edukiko dute. Bertan egunean sukaldean edo tabernako barran izena eman eta jai batzordekoek prestatzen duten bazkari ederragaz gozatzeko aukera egoten da urtero. Parrilan egiten dituzten txerri saiheskiak “sekulakoak” direla azpimarratu dute auzotarrek.
Aspaldiko garaietatik. Karteletik kanpo dauden ohitura zaharrak ere mantentzen dituzte Iturretan. Lehen kofradia osatzen zuten Iturretako baserrien artean, eta ermita zaintzeaz arduratzen ziren aldiro-aldiro baserri bi. Ohitura hori gaur egunera arte ailegatu da, eta aurtengo maiordomoak arduratuko dira domekarako ermita garbitu eta atontzeagaz. Hala ere, gaur egun beste auzotar guztien laguntza ere izaten dute, denen artean ateratzen dituzte jaiak aurrera.
Banda ordaintzeagaz ere ez da inor ahaztuko. Auzotarrek dohaintzan ematen dute dirua ermita jantzi edo beharrezko diren gastuetarako, eta Iturretan Banda ordaintzea esaten diote baserriaren izenean egiten den ekarpenari. Auzotarrek esan dutenez, aurten ere mahaia jarriko dute Banda ordaintzen dutenen oharrak hartzeko.
Mungiako Goietas jatetxearen idi bikotea jaietako idi probetan parte hartzen.
Aspaldiko garaietatik. Karteletik kanpo dauden ohitura zaharrak ere mantentzen dituzte Iturretan. Lehen kofradia osatzen zuten Iturretako baserrien artean, eta ermita zaintzeaz arduratzen ziren aldiro-aldiro baserri bi. Ohitura hori gaur egunera arte ailegatu da, eta aurtengo maiordomoak arduratuko dira domekarako ermita garbitu eta atontzeagaz. Hala ere, gaur egun beste auzotar guztien laguntza ere izaten dute, denen artean ateratzen dituzte jaiak aurrera.
Banda ordaintzeagaz ere ez da inor ahaztuko. Auzotarrek dohaintzan ematen dute dirua ermita jantzi edo beharrezko diren gastuetarako, eta Iturretan Banda ordaintzea esaten diote baserriaren izenean egiten den ekarpenari. Auzotarrek esan dutenez, aurten ere mahaia jarriko dute Banda ordaintzen dutenen oharrak hartzeko. 
