Gernika Jai Alaiko pilotariak ariko dira Markina-Xemeingo Master Seriesen
Jai Alaik martitzenean [uztailak 3] aurkeztu zuen aurtengo Jai Alai World Tour-eko egutegia eta zirkuituaren baitan jokatuko diren txapelketak. Asteburuan hasiko da Jai Alai Worl Tour, Hossegorreko Grand Slam txapelketagaz (barikuan) eta Markina-Xemeingo Master Seriesagaz (zapatuan), eta txapelketak azarora arte luzatuko dira.
Markina-Xemeingo txapelketa zapatuan 22:00etan hasiko da, Uni frontoian. Finalerdiak izango dira, eta horretan Gernika Jai Alaiko pilotariak ariko dira.
Lehenengo partiduan Diego Beaskoetxeak eta Eric Irastorzak Alex Hormaetxea eta Unai Lekerikaren kontra jokatuko dute. “Beaskoetxea figura da Dania Jai Alain, baina batez ere Euskal Herrian, ikaragarrizko maila ematen duelako”. Beaskoetxeak ia dena dauka irabazita. Bera da iazko Markina-Xemeingo txapelduna ere. Gainera, Mexikotik datorren Irastorzagaz bikote bikaina osatzen duela diote. “Hala ere, kontuz ibili beharko dute. Izan ere, Hormaetxea bermeotarra arriskutsua da, eta aurten Daniako atzelari onena izatea lortu duen Lekerikagaz ariko da”.
Bigarren finalaurrekoan, Goikoetxeak Ekhi gasteiztarragaz jokatuko du. “Jai Alai World Tour-eko azpitxapelduna da Ekhi, Mexikon figura egin da eta iaz ikaragarrizko maila erakutsi zuen Euskal Herrian”. Kontran edukiko dituzte Xabi Barandika, behetik gora datorren aurrelari gernikarra, eta Ibon Aldazabal berriatuarra, 2015eko Binakako Txapelduna eta pilota 305,77 kilometro orduko abiaduran botatzeagatik Guinnes Errekorren liburuan sartu berri dena. “Herritarrek Iñaki Osa Goikoetxearen itzulera ikusteko aukera edukiko dute zapatuan. Osa historiako pilotari onenetakoa da. Zirkuitutik kanpo geratu zen iaz, babesleagaz edukitako desadostasunengatik. Aurten, baina, Gernika Jai Alai enpresagaz egin du tratua”.
Finala Karmen Egunean (uztailak 16) izango da, 18:00etan hasita. Jakitera eman dutenez, kanporaketen arabera antolatuko dute Karmen Eguneko bigarren partidua.
Esan dutenez, Uni frontoiak errespetua ematen die pilotariei. “Markina-Xemeingo publikoa berezia da, pilotaz badaki, eta neurri batean asko eskatzen duen publikoa da. Beste leku batzuetan, esaterako, txalo errazago jotzen dute. Markina-Xemeinen ondo jokatu behar da, eta pilotari guztiak bertan batzen den jendearen aurrean onena emateko gogotsu egoten dira”.
Oro har, zirkuituko txapelketak ondoko herrietan jokatuko dira: Markina-Xemein, Gernika-Lumo, Lekeitio, Mutriku, Bordele, Bartzelona, Donostia, Hondarribia, Zumaia edo Hossegor.
