Itzelezko giroa ekarri du Kuadrillen Egunak Markina-Xemeinera

Larraitz Ibaibarriaga Etxaburu

2018/07/14

Txistularien kalejirak zabaldu du gaur [uztailak 14] Kuadrillen Eguneko egitaraua, eta eskupilota partidekin hasi da girotzen Zelai ingurua 11:30ean. Ordurako, asko ziren paella prestaketari ekinda zeudenak. Gaztetxoek eta helduagoek, guztiek nahi izan dute euren aletxoa ipini, eta irribarrea galdu barik eta tartean-tartean atsedenaldiren bat eginda prestatu dute herri bazkarian jan beharrekoa.

Bederatzi taldek parte hartu dute Herritxouan

Txiki geratu da beste behin ere Zelaia. 2.700 lagun inguru bildu dira paella janean. Eguzkiarengandik babesteko, sonbrilla koloretsuz bete da bazkari eremua, eta kantuz kantu, eta giro ezin hobean, Herritxoua ailegatu da arratsaldean. Abarka antzerki taldeak gidatuta, ez galtzeko hitzordu dibertigarriagaz gozatu dute ume, gazte zein nagusiek.

[zuzenean ARGAZKI GALERIA ikusi]

Sei saritu. Bederatzi taldek parte hartu dute aurtengoan, eta azken urteetako joerari jarraituz, nagusi talde nahikoa animatu dira show-a egitera. Amaieran, sei sari banatu dituzte: publiko aurreko saria Ane Maguregirentzat izan da; publikoarekiko jarrerarena Sagarra jo taldearentzat; animazioaren eta parte hartzearen saria Alaraukerentzat; agertokia ondo betetzearen saria Gu ere Billy Elliot gara-rentzat; beteranoen saria Mari Karmen Balentziagarentzat, eta, amaitzeko, Zelai osoan ikuskizuna ematearen saria Txikota taldearentzat. Saririk ederrena, dena dela, ikusleek eta parte hartzaileek eurek eraman dute, “ondo baino hobeto” pasatu dutelako.

[EGITARAUA]

Bihar [uztailak 15] Karmen bezpera ospatuko dute. 09:30ean hasi eta 22:00ak arte ez da faltako ondo pasatzeko ekimenik. HONEKIN LOTUTA: Jaien hasieraren KRONIKA eta BIDEOA