Lekittarrak denboraldiko bigarren bandera lortu du Pasaian
Atzoko estropadaren ostean, Astillero liderrarengandik lau puntura dago Lekeitioko taldea; 67 puntu ditu Astillerok, eta 63 puntu Lekittarrak. Atzetik Deusto-Bilbao eta Getaria daude 60 puntugaz berdinduta.
Aldea estua egon zen Pasaiako uretan. Talde lekeitiarraren arraunlariek 20 minutu, 27 segundo eta 44 ehunenetan burutu zuten VI. Errenteriako Hiria Ikurrinari zegokion estropada. Segundo bat eta 14 ehuneneko aldea atera zieten astillerotarrei. Deusto-Bilbao izan zen hirugarrena, 20 minutu, 29 segundo eta 82 ehuneneko denboragaz, eta Zarautz sartu zen laugarren (20:31.60).
Emozio handiko momentuak izan ziren atzo arratsaldean. Bigarren txandan, lehen ziaboga izan zen lehia estua biziko zenaren adierazle argia. 4 minutu eta 59 segundo markatu zituzten Deustoko eta Getariako arraunlariek. Segundo bakarrera sartu ziren lekeitiarrak, eta horiengandik hiru segundora zarauztarrak.
Bigarren ziabogan, baina, Lekittarra izan zen azkarrena: 10 minutu eta 3 segundo. Bi segundora sartu zen Getaria, eta laura Zarautz eta Deusto. Gero, hirugarren ziabogarako tartea handitzea lortu zuen Lekeitioko taldeak. 15:25 markatu zuen, eta bost segundora sartu ziren Getaria eta Deusto, eta seira Zarautz.
Asteburu honetan, etxean. KAE 1 Ligako zortzigarren eta bederatzigarren estropadak Lekeition lehiatuko dituzte asteburu honetan. Jardunaldi bikotzean erabakiko da bandera. Zapatuko zein domekako estropadak 12:00etan hasiko dira.
Arraunlariak garaipena ospatzen, atzo arratsaldean. Argazkia: KAE 1 Liga.
