Markina-Xemeingo II. Jazzaldiak harrera oso ona eduki du
Eguraldia dela eta kontzertu batzuk lekuz aldatu beharra eduki badute ere, Markina-Xemeingo II. Jazzaldiaren balorazio ona egin du Uhagon Kultur Elkarteak. Barikutik [uztailak 20] domekara [uztailak 22] ospatu den jaialdiak izandako publikoaren erantzun ona eta kontzertuen aniztasuna azpimarratu dituzte, eta emaitzagaz “oso pozik” agertu dira antolatzaileak.
Publikoari jazz estilo ezberdinak helaraztea izan dute helburu, eta lortu dutela azaldu dute. “Jazzaren barruan aniztasun handia dago eta hiru estilo ezberdineko taldeak ekarri ditugu entzuleei eskaintzeko. Publikoaren sentsazioa oso ona izan da, gustuko izan dituzte”. Adin tarte zabalarengana ailegatu dira gainera, ume, gazte eta nagusi. “Heldu asko egon zen barikuan, eta oso ondo pasatu zutela aitatu ziguten”.
Dr. Maha’s Miracle Tonic-en swing, western swing eta rhythm and blues erritmoek zabaldu zuten Jazzaldia barikuan. “Musika alaia eta polita eskaini zuen taldeak, umorez betea, eta publikoak oso ondo pasatu zuen”, zehaztu dute. Kontzertua entzuten “zoriontsua” izan zela aditzera eman zuen batek esate baterako. Euria zela eta kulturgune barruan egin behar izan zuten kontzertua, eta aretoa bete egin zen.
Beste era bateko kontzertua izan zen zapatuan Roberto Pachecoren eskutik Uhagoneko lorategian gozatu ahal izan zena. Roberto Pachecok, beste bederatzi musikariez lagunduta, Charlie Parker historiako musikaririk garrantzitsuenetakoak soka orkestra bategaz egindako grabazioaren moldaketa eskaini zuen. Rocker, Just Friends eta I’ve got you under my skin abestiak jo zituzten besteak beste. “Luxuzko kontzertua inguru paregabean”, publikoaren esanetan.
Arkupetik Kontzekupera lekualdatu zuten, azkenik, Maraya Zydeco Trio hirukotearen kontzertua. “Blues eta zydeco doinu gogorragoak”, esan dute antolatzaileek, hala ere, gustura egon zen publikoa kontzekupean. “Musika jendearengana hurbiltzea dugu helburu, hori dela eta azken kontzertu hau kalean egitea erabaki genuen, normalean jazz kontzertu batera joango ez den jendearengana gerturatzeko”. Zentzu beragaz antolatu zuten bai eta ere Karmen jaiak aurretik Markina-Xemeingo kaleetan zehar egon zen Euskorleans Dixie Band-en kontzertua. “Jazz estilo ezberdin bat ezagutzeko beste aukera bat izan zen”.
Aurten ere eduki duen emaitza ona ikusita, aurrera egingo du Jazzaldiak, eta datarik zehaztuta ez badaukate ere, udara begira egingo dela aurreratu dute Uhagon Kultur Elkartekoek, “kulturguneko kanpoko aldea aprobetxatzeko”. Eskerrak ere eman nahi dizkiote bazkideei eta publikoari erakutsitako jarrera onagatik, bai eta emanaldia aurrera eramateko laguntza eman duten guztiei ere.
Dr. Maha’s Miracle Tonic-en kontzertua kulturgunean. Argazkia: Uhagon Kultur Elkartea
Charlie Parker with strings kontzertua Roberto Pachecoren eskutik, zapatuan Uhagoneko lorategian.
