Nice Idee-k Lekeitioko Elikagai Bankuaren aldeko kontzertu solidarioa eskainiko du
Lekeitioko Elikagaien Bankua laguntzeko kontzertua eskainiko du eguenean [uztailak 26], Lekeitioko Eskolako frontoi txikian, Nice Idee-k. Kontzertuak 10 euroko sarrera edukiko du, eta lortzen den dirua Elikagai Bankurako janaria eskuratzeko izango dela azaldu du Marisol Iturraspe Lekeitioko Elikagaien Bankuko arduradunak.
“Belgikan bizi den senegaldar jatorriko Nice Idee musikariak jotzeko eskaintza egin ziguten, eta beso zabalik hartu genuen borondate onez egindako proposamena, Elikagaien Bankuak beti edukitzen du-eta premia”, adierazi du Iturraspek.
Kontzertua 21:30ean hasiko da, eta taberna txiki bat ere jartzeko asmoa daukatela aurreratu dute. “Kanta alaiak dira, oso politak eta jendea animatzea espero dugu”.
Barikuan [uztailak 27], berriz, Jori Tabernan joko du, 22:00etan.
