Arropain auzoko errepidean oinezkoen ibilbidea osatzeko elkarlan hitzarmena sinatu dute Ispaster eta Lekeitioko Udalek
Arropain auzoan dagoen BI-2405 errepidean oinezkoentzako espaloia egiteko lanak bideratuko dituzte hurrengo hilabeteetan. Arropain auzoa Ispaster eta Lekeitio udalerri mugen artean banatzen da, eta bertan egingo diren lanak ere bi udalerrien artean kudeatuko dira. Hori dela eta, lanen kudeaketa bateratua egin asmoz, elkarlan hitzarmena sinatu dute Ispasterreko eta Lekeitioko Udalek.
“Akordio honegaz, bidearen ezker aldean espaloia eraikiko da, egun dagoen oinezkoen ibilbidea osatuko da”, azaldu dute. Ondorioz, errepidea kale bihurtuko dela zehaztu dute bi udalek. “Oinezkoak bertatik igarotzea erraztuko da, hauei lehentasuna emanez eta bide-segurtasuna bermatuz”.
Lanak uda ostean hasiko dituzte eta lau hilabeteko iraupena izatea aurreikusten dute.
Garbiñe Saenz de Buruaga Ispasterko alkatea eta Koldo Goitia Lekeitioko alkatea hitzarmena sinatzen. Argazkia: Lekeitioko Udala
