Egun handiak ispastertarrentzat
Atzo arratsaldean hasi ziren Ispasterko Santiago eta Santa Ana Jaiak. Garbiñe Saenz de Buruaga alkateak irakurri zuen pregoia, eta alboan izan zituen Tximista Atletismo Taldeko eta Isuntza Arraun Taldeko kide diren herriko bost neska gaztetxo.
[zuzenean ARGAZKI GALERIA OROKORRERA JOAN]
Alkateak jaien antolakuntzan aritzen direnen lana goraipatu zuen: “Nire eskerrik zintzoena beste batzuk ondo pasatzeko, urte guztian eta batez ere gaurko egunean lanean zaudeten guztioi. Eskerrik asko Jai Batzordeari”. Hain zuzen, Jai Batzordearen proposamenez parte hartu zuten herriko bost neskek jaiei hasiera emateko ekitaldian. Bost kirolari horiek zein bere arloan egindako lana eta lortutako garaipenak azpimarratu zituen Saenz de Buruagak. Arraunean, Bizkaiko Liga eta Bizkaiko Txapelketan zilarrezko dominak eta atletismoan Bizkaiko, Euskadiko eta Espainiako txapelketetan hainbat domina irabazi dituztela gogora ekarri zuen. Hain zuzen, horietako domina batzuk soinean zituztela igo ziren balkoira. Jarraian, txupina jaurti, eta Txanton Pipirri igo zuten eleizako kanpandorrera. Orduan, danbor hotsek hartu zuten plaza. Ume gazte zein nagusiek giro ederra sortu zuten, Aitxitxa Makurra txarangak lagunduta. Plaza bete jende batu zen udalerriko jai nagusiei hasiera goi-goitik emateko.[zuzenean ARGAZKI GALERIA OROKORRERA JOAN]
Gaur eguerdian, berriz, Eleixaldetik kalejiran hurreratu dira Santiagoko baselizara. Meza entzun ostean, Xabat Galletebeitia lekeitiarraren eta Jone Uria algortarraren bertsosaioan elkartu dira, baselizaren ondoko zelaian. Umorea ez da falta izan, eta besteren artean, Santiago eta Santa Ana jaiak eta herriko zein Lekeitioko eta Getxoko kontuak izan dituzte hizpide bertsotan. Arratsaldean ere ume, gazte zein nagusiek ondo pasatzeko aukera ederra daukate, eta gauean, Dangiliskeren musikak hartuko du plaza. EGITARAUA:- UZTAILAK 25
- 17:30. Gin kana umeentzat eta gaztetxoentzat.
- 18:00. Mus Txapelketa.
- 22:00. Dangiliske plaza dantza taldearen emanaldia.
- UZTAILAK 26 (SANTA ANA EGUNA)
- 10:00. Meza Santiagoko baselizan.
- 11:30. Ispasterko harrobiko gaztetxoen esku pilota partiduak.
- 12:00. Meza Nagusia Mikel Deunaren baselizan.
- 13:30. Emakumeen esku pilota partidua: Gentzane-Etxaniz vs. Arizmendi-Arrizabalaga.
- 18:00. 24. Kross Lasterketa Herrikoia: gazteak.
- 19:00. 24. Kross Lasterketa Herrikoia: nagusiak.
- 22:30. Puro Relajo mariatxi taldearen emanaldia.
- UZTAILAK 27 (SANTANATXU EGUNA)
- 14:30. Herri bazkaria.
- 18:00. XII. Banakako Bolo Txapelketa.
- 21:00. Mozorro lehiaketa.
- 23:30. Lisker taldearen erromeria.
- 00:00. Txanton Pipirriren jaitsiera.
- Jarraian. Lisker taldearen erromeria, eta atsedenaldian soka saltoa.
- Oharra. Gababus zerbitzua eta Ea-Ispaster autobus zerbitzua.
