Jaien hasierako txupina bota dute Etxebarrian

2018/07/25

Indartsu hasi dituzte santixauak etxebarritarrek. Aurreko egunetan motorrak berotzen hasita bazeuden ere, gaur [uztailak25] bota dituzte pregoia eta txupina. Mari Carmen Bustindui eta Idoia Odriozola zinegotziek agurtu dituzte lehendabizi herritarrak eta sarrera emanda, Etxebarriko Jubilatuen Elkartekoak hurreratu dira mikrofonora. Miguel Angel Arrizabalaga lehendakariak eta Mari Carmen Egaña elkarteko kideak irakurri dute pregoia.

Miguel Angel Arrizabalagak eta Mari Carmen Egañak bota dute pregoia.

Santixau jaiak eurekin batera ondo pasatzera animatu ditu herritar guztiak Arrizabalagak. “Nahi duenak 100 urte hartu jubilatuetan apuntatu”. Egañak, berriz, eskerrak eman ditu elkarteari pregoia emateko ohorea eskaintzeagatik, eta elkartean pozik daudela azaldu du gero eta gehiago direlako eta gero eta ekintza gehiagotan parte hartzen dutelako. “Belaunaldien arteko ekintzetan, jaietan, Euskara gurean… Beti gaude prest herriko ekintzetan parte hartzeko”. Domekan hamar herritar omenduko dituztela ere gogora ekarri du Egañak, 80 eta 81 urtekoak, eta gazte, Guraso Elkarteko kide eta Kultur batzordean parte hartzen duten talde eta norbanako guztiak aitatu nahi izan ditu “burubelarri ekintzak prestatzen aritzen direlako”.

[zuzenean ARGAZKI GALERIARA JOAN]

Amaitzeko, jaiak ondo-ondo eta gozo-gozo ospatzea opa die herritar guztiei, “baina elkar errespetatuz”. Jaiei hasiera emanda Markina-Xemeingo Zerutxu Dantza Taldeko dantzariak atera dira udaletxe aurreko berdegunera dantzara. Gaur euri apur bat egin duen arren, karpa ezarrita dauka udalak, eta haren babesean egin ahalko dituzte datozen egunotan jaietako ekimenak. Zerutxuko neska-mutilek dantzaldi dotorea eskaini dute karpapean batutako ikusleen aurrean, Aurreskua, Arku dantza, Txotxongiloa, Agintariena eta Txakarrankoa dantzatu dituzte besteak beste.