Bertsoak eta zientziak bat egingo dute Ondarroan
Jakinduriek mundue erreko dau leloaren pean, bertsoak eta zientzia uztartuko dira, bigarren urtez jarraian, ostegunean [irailak 20], 18:30etik aurrera, Ondarroako Beikozini aretoan, Euskal Herriko Unibertsitateko Kultura Zientifikoko Katedrak antolatutako ekimenean.
Igor Elortza eta Onintza Enbeita bertsolariak arduratuko dira bertsoak jartzeaz, eta Onintze Salazar metereologoa, Jon Larruskain Jarduera Fisikoaren eta Kirolaren Zientzietan lizentziatua eta Oscar Gonzalez kimikaria izango dira hizlari gonbidatuak. Aurkezle zereginetan Kike Amunarriz soziolinguista, umorista eta telebista aurkezlea arituko da.
Zientziaren dibulgaziorako ekimen bat, Beikozini aretoan.
“Zientziarekiko interesa pizteko komunikazioa ezinbesteko tresna da, eta lan horretan bidelagunak aurkitzea eta askotariko esparruak uztartzea beharrezkoa. Uztarketa horren fruitua da Jakinduriek mundue erreko dau bertsozientzia emanaldia”, adierazi dute antolatzaileek.
Gehiago ere badiote ekimenaren sustatzaileek. “Zientzia da giza kulturaren zati handi bat, eta zientziaren oinarriak ezagutu gabe kultur ondarearen zati hori gabe geldituko ginateke. Zientziaz gain bertsolaritza ere badugu euskal kulturaren ondarea. Bertsolaritzaren gakoa da “bizitza kantatzea” eta egunero jasotzen dugun gehiegizko informazioa digeritzen laguntzea doinua, errima eta neurria lanabes hartuta”.
Zientzialariek hamar minutuko hitzaldiak emango dituzte eguneroko hainbat gai uztartuz, eta bertsolariek errima eta doinua jarriko dizkie gaiei. Ondarroako ekitaldiaren atzetik, beste hitzordu bi datoz jarraian. Irailaren 21ean, Durangon eta irailaren 29an, Igorren.
